ഔഷധങ്ങളുടെ റാണിയാണ് തുളസി. തുളസിയില മാത്രമല്ല അതിന്റെ പൂവും തണ്ടും വരെ നിരവധി രോഗങ്ങളെ ചെറുക്കാന്‍ ശേഷിയുള്ളതാണ്. ഒട്ടനവധി ആരോഗ്യപ്രശ്‌നങ്ങളില്‍ നിന്നും രക്ഷനേടാന്‍ തുളസി സഹായിക്കും. വീട്ടുമുറ്റത്ത് കുറച്ച് തുളസിച്ചെടികള്‍ ഉണ്ടെങ്കില്‍ത്തന്നെ എന്തിനും ഏതിനും ആശുപത്രിയിലേക്ക് ഓടുന്ന അവസ്ഥ ഒഴിവാക്കാം. കൊച്ചുകുട്ടികള്‍ മുതല്‍ മുതിര്‍ന്നവരെ വരെ അലട്ടുന്ന പ്രധാന പ്രശ്‌നമാണ് പനിയും ജലദോഷവും. പനി മാറുന്നതിന് തുളസിയിലയുടെ നീര് കഴിച്ചാല്‍ മതി.
വെറും വയറ്റില്‍ തുളസിയില ചവയ്‌ക്കുന്നത് ജലദോഷത്തില്‍ നിന്നും ജലദോഷ പനിയില്‍ നിന്നും രക്ഷനേടാന്‍ സഹായിക്കും. തൊണ്ട വേദനയുണ്ടാവുമ്പോള്‍ തുളസിയിലയിട്ട് തിളപ്പിച്ച വെള്ളം ഇളംചൂടില്‍ വായില്‍ കവിള്‍കൊണ്ടാല്‍ മതി. ആസ്ത്മ, ബ്രോങ്കൈറ്റിക്‌സ് രോഗികള്‍ക്ക് ഇത് ഏറെ ഗുണകരമാണ്. തലവേദന മാറുന്നതിന് തുളസിയിലയും ചന്ദനവും പേസ്റ്റ് രൂപത്തിലാക്കി നെറ്റിയില്‍ പുരട്ടുക. നേത്ര രോഗങ്ങള്‍ ചികിത്സിക്കാന്‍ കരിംതുളസിയില നല്ലതാണ്. കരിംതുളസിയുടെ നീര് ഒന്ന് രണ്ട് തുള്ളി കണ്ണില്‍ ഉറ്റിക്കുന്നത് വേദന അകറ്റാന്‍ സഹായിക്കും.
തുളസിയില ഉണക്കി പൊടിയാക്കിയതും കടുക് ഓയിലും ചേര്‍ത്ത് പേസ്റ്റ് രൂപത്തിലാക്കുക. ഇത് പല്ലില്‍ തേയ്‌ക്കുകയോ അല്ലെങ്കില്‍ ബ്രഷ് ചെയ്യുകയോ ചെയ്യുക. വായ്‌നാറ്റം അകറ്റാന്‍ സഹായിക്കും. ചര്‍മ രോഗങ്ങള്‍ അകറ്റാനും തുളസിനീര് ഉത്തമമാണ്. തേനും തുളസിയിലയുടെ നീരും മിക്‌സ് ചെയ്ത് കഴിച്ചാല്‍ മൂത്രത്തില്‍ കല്ല് ഭേദമാകും. കുറച്ച് തുളസിയില ദിവസവും കഴിക്കുന്നത് മാനസിക സമ്മര്‍ദ്ദം കുറയ്‌ക്കും. തുളസിക്ക് രക്തം ശുദ്ധീകരിക്കാനും കഴിവുണ്ട്. ചര്‍മത്തിനു തിളക്കം നല്‍കാനും രക്തജന്യ രോഗങ്ങള്‍ ഒഴിവാക്കാനും തുളസി നീര് സഹായിക്കും.
മുഖക്കുരു അകറ്റാന്‍ മുഖക്കുരുവിനു മുകളില്‍ തുളസി അരച്ചിടുന്നതും നല്ലതാണ്.
ഹൃദയാരോഗ്യത്തിനും ബിപി കുറയ്‌ക്കാനും തുളസിയില സഹായിക്കും. തുളസിനീര് പതിവായി കഴിച്ചാല്‍ ഓര്‍മ്മശക്തി വര്‍ദ്ധിക്കും. തുളസി നീരും തുളസിക്കാപ്പിയും പതിവായി കഴിക്കുന്നത് ഹൃദയത്തെ ശക്തിപ്പെടുത്തുന്നു. രക്തത്തിലെ കൊളസ്‌ട്രോള്‍ കുറയ്‌ക്കുന്നു. തുളസിനീര് കണ്ണില്‍ പുരട്ടുന്നത് നേത്രരോഗങ്ങള്‍ മാറ്റും. വിറ്റാമിന്‍ ‘ എ’ യുടെ കുറവുമൂലമുണ്ടാകുന്ന നിശാന്ധത പരിഹരിക്കാന്‍ തുളസിനീര് കഴിക്കുകയും കണ്ണിലൊഴിക്കുകയും ചെയ്താല്‍ മതി. രണ്ടു തുള്ളി തുളസിനീര് രാത്രി കിടക്കാന്‍ നേരം കണ്ണില്‍ ഒഴിക്കുന്നതു മൂലം കണ്‍ജക്റ്റിവിറ്റി പോലുള്ള രോഗങ്ങളെ പ്രതിരോധിക്കാന്‍ കഴിയും. തൊലിക്ക് ആരോഗ്യവും തിളക്കവും നല്‍കുന്നതിന് തുളസിനീര് പുരട്ടി തടവുക. പുഴുക്കടി, വെള്ളപ്പാണ്ട് തുടങ്ങിയ രോഗങ്ങള്‍ക്ക് ശമനം ലഭിക്കുന്നതിന് തുളസിനീര് കഴിക്കുകയും പുറമെ പുരട്ടുകയും ചെയ്യുക.
തുളസിയില നീരും ഇഞ്ചിനീരും സമം ചേര്‍ത്ത് കുട്ടികള്‍ക്ക് കൊടുത്താല്‍ അവരുടെ ഛര്‍ദ്ദി ശമിക്കും. തുളസിയില അല്‍പ്പം ഉപ്പുമായി തിരുമ്മി പിഴിഞ്ഞെടുത്ത നീര് പതിവായി കഴിച്ചാല്‍ വിശപ്പില്ലായ്മക്ക് പരിഹാരം ലഭിക്കും.
പ്രതികരിക്കാൻ ഇവിടെ എഴുതുക: