കുന്നത്തൂര്: കൊല്ലം-തേനി ദേശീയപാതയുടെ നിര്മ്മാണത്തിന്റെ ആദ്യഘട്ടമായി കടപുഴ മുതല് ആലപ്പുഴ ജില്ലയിലെ കൊല്ലക്കടവ് വരെയുള്ള പാത ദേശീയപാതാ നിലവാരത്തിലേക്കുയര്ത്താനുള്ള ദേശീയപാത അതോറിറ്റിയുടെ പദ്ധതി സ്വന്തം പേരിലാക്കാന് സംസ്ഥാന സര്ക്കാരിന്റെ ശ്രമം. അതിനായി പൊതുമരാമത്ത് മന്ത്രി വി.കെ.ഇബ്രാഹിംകുഞ്ഞിന്റെ
ഉദ്ഘാടന പ്രഹസനമാണ് ഭരണിക്കാവില് ഇന്ന് അരങ്ങേറുന്നത്.
പാതാ നവീകരണത്തിനായി 60 കോടിയുടെ പദ്ധതിക്കാണ് ദേശീയപാത അതോറിറ്റി കരാര് നല്കിയത്. പൂര്ണമായും കേന്ദ്രഫണ്ടുപയോഗിച്ച് നടപ്പില് വരുത്തുന്ന ഈ പദ്ധതിയുടെ ക്രെഡിറ്റ് നേടാനാണ് സര്ക്കാര് ശ്രമിക്കുന്നത്. കേന്ദ്ര ഫണ്ടുപയോഗിച്ച് പദ്ധതികള് കൊണ്ടുവരുമ്പോള് സ്ഥലം എംപി ആയിരിക്കണം ഉദ്ഘാടകന് എന്നതാണ് പുതിയ വ്യവസ്ഥ. ആ വ്യവസ്ഥ ലംഘിച്ച് ഇവിടെ നിര്മ്മാണോദ്ഘാടനം ചെയ്യുന്നത് പൊതുമരാമത്ത് വകുപ്പ് മന്ത്രി വി.കെ.ഇബ്രാഹിംകുഞ്ഞാണ്.സ്ഥലം എംപി കൊടിക്കുന്നില് സുരേഷ് അദ്ധ്യക്ഷന് മാത്രമാണ്.
കുന്നത്തൂര്, മാവേലിക്കര എംഎല്എമാരെ മുഖ്യാതിഥികളായും ക്ഷണിച്ചിട്ടുണ്ട്. നിര്മ്മാണപ്രവര്ത്തനങ്ങള് ആരംഭിച്ച് ഏതാണ്ട് 25 ശതമാനത്തോളം പണികള് പൂര്ത്തീകരിച്ച് കഴിഞ്ഞപ്പോഴാണ് നിര്മ്മാണോദ്ഘാടനം എന്ന പേരില് പരിപാടി സംഘടിപ്പിച്ചിരിക്കുന്നത്. ജില്ലയില് പൊതുമരാമത്ത് മന്ത്രിയുടെ മറ്റ് പരിപാടികള് ഉള്ളതിന്റെ കൂടെ ഇതുകൂടി തട്ടിക്കൂട്ടുകയായിരുന്നു. മന്ത്രിയുടെ സൗകര്യത്തിനായി രണ്ടാഴ്ച മുമ്പ് ആരംഭിക്കേണ്ടിയിരുന്ന ടാറിങും തടസപ്പെടുത്തി. നിലവില് കടപുഴ മുതല് ഭരണിക്കാവ് വരെ വീതി കൂട്ടാനായി റോഡില് മെറ്റലിട്ട് ഉയര്ത്തിയിട്ടുണ്ട്. ദേശീയപാതാ വികസനത്തില് സ്ഥലം ഏറ്റെടുത്ത് നല്കുക എന്നതുമാത്രമാണ് സംസ്ഥാനസര്ക്കാരിന്റെ ചുമതല.
ഇവിടെ അതിന്റെ നടപടികള് ആരംഭിക്കാനിരിക്കുന്നതേയുള്ളു. അതിനാല് തന്നെ ഇവിടെ സംസ്ഥാനസര്ക്കാരിന് കാര്യമായ റോളുകള് ഇല്ലെന്നിരിക്കെ മുഖ്യമന്ത്രിയുടെയും മറ്റ് യുഡിഎഫ് നേതാക്കന്മാരുടെയും ഫഌക്സ് ബോര്ഡുകള് കൊണ്ട് പ്രദേശം നിറഞ്ഞിരിക്കുകയാണ്. ഇത് സംസ്ഥാനസര്ക്കാരിന്റെ പദ്ധതിയാണെന്ന് പൊതുജനങ്ങളെ തെറ്റിദ്ധരിപ്പിക്കാനാണ് നീക്കം നടക്കുന്നത്.
ഉദ്ഘാടനത്തില് പങ്കെടുക്കുന്ന ജനപ്രതിനിധികള് ഏറിയപങ്കും യുഡിഎഫ് അംഗങ്ങളാണ്. ശിവരാത്രി ദിനവും പ്രദേശത്തെ പ്രധാന ക്ഷേത്രോത്സവവും നടക്കുന്ന ഇന്ന് തന്നെ ഉദ്ഘാടനപരിപാടി സംഘടിപ്പിച്ചതിന് പിന്നിലും ഗൂഡലക്ഷ്യങ്ങളാണുള്ളത്. പ്രതിഷേധം ഉയരാതിരിക്കാനായി എല്ലാ രാഷ്ട്രീയകക്ഷി നേതാക്കളെയും ചടങ്ങിന് ക്ഷണിച്ചിട്ടുണ്ട്.
