മണ്ണഞ്ചേരി: ചികിത്സാ സഹായ അഭ്യര്‍ത്ഥനയുമായി മദ്യപിച്ച് ഓട്ടോയില്‍ സ്‌കൂളിലെത്തിയ മൂവര്‍ സംഘം മൊബൈല്‍ ഫോണ്‍ അപഹരിക്കാന്‍ ശ്രമിച്ചതായി പരാതി. സ്‌കൂളധികൃതരും നാട്ടുകാരും ചേര്‍ന്ന് പ്രതികളെ പിടിച്ച് പോലീസില്‍ ഏല്‍പ്പിച്ചു. ചങ്ങനാശേരി വാഴപ്പള്ളി ചിറയില്‍ ബാബു (50), ആലപ്പുഴ ആറാട്ടുവഴി കൈതപ്പോളയില്‍ ഷാജി (49) എന്നിവരാണ് പിടിയിലായത്. ഓട്ടോ ഡ്രൈവര്‍ സജി ഓട്ടോയുമായി രക്ഷപ്പെട്ടു.
പൊന്നാട് പഞ്ചായത്ത് എല്‍പി സ്‌കൂളിലാണ് വെള്ളിയാഴ്ച വൈകിട്ട് മൂന്നോടെ സംഘമെത്തിയത്. ചികിത്സാസഹായത്തിന്റെ പേരില്‍ എത്തിയ സംഘം അദ്ധ്യാപകരോട് പണം ആവശ്യപ്പെടുകയായിരുന്നു. എന്നാല്‍ പിടിഎയുമായി ആലോചിച്ച് തുക പിന്നീട് നല്‍കാമെന്ന് പറഞ്ഞെങ്കിലും ഇവര്‍ സ്‌കൂളില്‍ നിന്ന് പോകാന്‍ കൂട്ടാക്കിയില്ല. അദ്ധ്യാപകരോട് തട്ടിക്കയറിയതായും പറയപ്പെടുന്നു. ഇതേസമയം തന്നെ ഇവര്‍ ഓഫീസിലിരുന്ന മൊബൈല്‍ഫോണ്‍ കൈവശപ്പെടുത്താന്‍ ശ്രമിച്ചതായി വിദ്യാര്‍ത്ഥികളില്‍ ചിലര്‍ പറഞ്ഞു.
ഇതിനെത്തുടര്‍ന്നാണ് അദ്ധ്യാപകരും നാട്ടുകാരും ചേര്‍ന്ന് ഇവരെ പിടിച്ചുവച്ച് പോലീസില്‍ ഏല്‍പ്പിച്ചത്. എന്നാല്‍ സംഘം മൊബൈല്‍ഫോണ്‍ കവര്‍ന്നശേഷം രക്ഷപ്പെടാന്‍ ശ്രമിക്കവെ നാട്ടുകാര്‍ പിടികൂടിയതാണെന്നും പറയപ്പെടുന്നു.
പ്രതികരിക്കാൻ ഇവിടെ എഴുതുക: