കൊച്ചി: ആധാര്‍ ഖുരാന സംവിധാനം ചെയ്ത ‘ഇന്റേണല്‍ അഫയേഴ്‌സ്’ എന്ന ഇംഗ്ലീഷ് നാടകം കൊച്ചി ജെടി പായ്‌ക്കില്‍ 18ന് അവതരിപ്പിക്കുന്നു. നാടകത്തിന്റെ രചന അധിര്‍ ഭട്ട്, ബോബി നഗ്ര എന്നിവരുടേതാണ്. വൈകിട്ട് ഏഴിനാണ് ഷോ.
നഗരങ്ങളിലെ വ്യക്തിബന്ധങ്ങളുടെ പൊള്ളത്തരങ്ങളും പഴയകാല ജീവിതത്തിലെ പാപബോധവും കൂടിക്കുഴയുമ്പോള്‍ ജീവിതം തുലാസില്‍ ആടുന്നത് വേദിയില്‍ കാട്ടിത്തരുകയാണ് ഇന്റേണല്‍ അഫയേഴ്‌സ്. പുതിയ ജോലിയില്‍ പ്രവേശിക്കുമ്പോള്‍ ജീവിതം ആടിയുലയുന്ന ആഴിയിലേയ്‌ക്ക് എടുത്തെറിയപ്പെടുകയാണെന്ന് സിദ് വിചാരിച്ചില്ല. മദ്യപാനവും കൂടെ ജോലി ചെയ്യുന്ന റിയയുമൊത്ത് അവിഹിത ബന്ധവും ജീവിതത്തെ കടുത്ത പ്രതിസന്ധിയിലാക്കി. പഴയകാല പ്രണയജീവിതത്തെക്കുറിച്ചുള്ള കുറ്റബോധം കൂടിയാവുമ്പോള്‍ ജീവിതം പുതിയൊരു വഴിത്തിരിവിലെത്തിക്കഴിഞ്ഞിരുന്നു.
ഗ്ലാസ്‌ഗോയില്‍നിന്ന് ഫോറന്‍സിക് സയന്‍സില്‍ ബിരുദം നേടിയ ആധാര്‍ ഖുരാന പതിനഞ്ചിലധികം പ്രഫഷണല്‍ നാടകങ്ങളില്‍ അഭിനയിച്ചിട്ടുണ്ട്. ഹുസൈന്‍ ദലാല്‍, ദില്‍ഷാദ് എഡിബാം, പ്രിയാംശു പൈനുള്ളി, ശിഖ തല്‍സാനിയ എന്നിവരാണ് അഭിനേതാക്കള്‍.
പ്രതികരിക്കാൻ ഇവിടെ എഴുതുക: