ആലപ്പുഴ: അമ്പലപ്പുഴയില്‍ വ്യത്യസ്ത വാഹനാപകടങ്ങളില്‍ മൂന്ന് പേര്‍ക്ക് പരിക്ക്. ദേശീയപാതയില്‍ പുറക്കാട് പഴയങ്ങാടി ജങ്ഷനില്‍ ബൈക്കുകള്‍ കൂട്ടിയിടിച്ച് പരിക്കേറ്റ യാത്രികനെ ആശുപത്രിയില്‍ പ്രവേശിപ്പിച്ചു. മാവേലിക്കര ഭരണിക്കാവ് ഈപ്പളളി വിളയില്‍ പുത്തന്‍വീട്ടില്‍ ശിവരാമ (60)നെയാണ് വണ്ടാനം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചത്.
ശനിയാഴ്ച വൈകിട്ട് മൂന്നോടെയായിരുന്നു അപകടം. വണ്ടാനം ആശുപത്രിയില്‍ നിന്നും മാവേലിക്കരയ്‌ക്ക് പോകുകയായിരുന്ന ഇയാള്‍ സഞ്ചരിച്ചിരുന്ന ബൈക്കിനു പിന്നില്‍ ഇതേദിശയില്‍ നിന്നും വന്ന ബൈക്കു ഇടിക്കുകയായിരുന്നു. ഇയാള്‍ അപകടാവസ്ഥ തരണം ചെയ്തിട്ടില്ല. കച്ചേരിമുക്കിന് സമീപം പിക്കപ്പ് വാനും ബൈക്കും കൂട്ടിയിടിച്ച് ബൈക്കുയാത്രക്കാരായ രണ്ടു യുവാക്കള്‍ക്ക് പരിക്കേറ്റു. ഇവരെ ആശുപത്രിയില്‍ പ്രവേശിപ്പിച്ചു.
അമ്പലപ്പുഴ കോമന പുതുവല്‍ വീട്ടില്‍ സുധി (24), കോമന സുജിത് നിലയത്തില്‍ സുജിത് (20) എന്നിവരെയാണ് വണ്ടാനം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചത്. ശനിയാഴ്ച വൈകിട്ട് നാലരയോടെയായിരുന്നു സംഭവം. ബൈക്കില്‍ എതില്‍ദിശയില്‍നിന്നും വന്ന തമിഴ് നാട് രജിസ്‌ട്രേഷനുളള പിക്കപ് വാന്‍ ബൈക്കിലിടിക്കുകയായിരുന്നു. ഇരു സംഭവങ്ങളിലും അമ്പലപ്പുഴ പോലീസ് മേല്‍നടപടി സ്വീകരിച്ചു.
പ്രതികരിക്കാൻ ഇവിടെ എഴുതുക: