മുഖത്തല: ചെന്താപ്പൂര് മാടന്‍കാവ് ക്ഷേത്രത്തില്‍ വീണ്ടും പോലീസ്അതിക്രമം.
സ്വകാര്യ വ്യക്തിയുടെ പരാതിയെ തുടര്‍ന്ന് ഇന്നലെ രാവിലെ കൊട്ടിയം സിഐയുടെ നേതൃത്വത്തില്‍ എത്തിയ പോലീസ് സംഘമാണ് അക്രമണം നടത്തിയത്. ക്ഷേത്രത്തിനുള്ളില്‍ കയറിയ പോലീസ് സംഘം ക്ഷേത്രസംരക്ഷണ സമിതിയുടെ ബോര്‍ഡും ക്ഷേത്രത്തിലുള്ള പട്ടും നശിപ്പിച്ചു.
ചോദ്യം ചെയ്ത ഭക്തരെ സിഐ കയ്യേറ്റം ചെയ്യുകയും അസഭ്യ പറയുകയും ചെയ്തു. പോലീസ് അക്രമത്തില്‍ പ്രതിഷേധിച്ച സ്ഥലത്തെ ഹിന്ദു സംഘടനനേതാക്കളായ സജീവ്,മണിക്കുട്ടന്‍,രഞ്ജിത്ത്, രതീഷ് എന്നിവരെ ബലമായി പോലീസ് ജീപ്പില്‍ കയറ്റി സ്റ്റേഷനില്‍ കൊണ്ടുപോയി. സംഭവമറിഞ്ഞെത്തിയ ഹിന്ദുഐക്യവേദിപ്രവര്‍ത്തകരും ഭക്തജനങ്ങളും കൂടി ക്ഷേത്രത്തില്‍ ഭജന പാടി പ്രതിഷേധിച്ചു.
പോലീസ് പിടിച്ചുകൊണ്ടുപോയവരെ മോചിപ്പിക്കണമെന്നാവശ്യപ്പെട്ടായിരുന്നു പ്രതിഷേധം. തുടര്‍ന്ന് ഹിന്ദു ഐക്യവേദി സംസ്ഥാന സെക്രട്ടറി തെക്കടം സുദര്‍ശനും ആര്‍എസ്എസ് ബൗദ്ധിക് പ്രമുഖ് കാ.ന.അഭിലാഷും പോലീസുമായി നടത്തിയ ഇടപടലിനെ തുടര്‍ന്ന് പിടിച്ചു കൊണ്ടുപോയ ഹിന്ദുസംഘടന പ്രവര്‍ത്തകരെ വിട്ടയച്ചു.
നഗര്‍കാര്യ വാഹക് കണ്ണന്‍, ലാലു, ജയന്‍, ബാലഗോകുലം കൊട്ടിയം നഗര്‍ കാര്യദര്‍ശി സുനിത്ത് ദാസ് അരുണ്‍, ബിജെപി നേതാക്കളായ വിനോദ്, പ്രസാദ് സന്തോഷ് അനില്‍ ഹിന്ദുഐക്യവേദി സെക്രട്ടറി സന്തോഷ്, ബിഎംഎസ് നേതാവ് രാജേന്ദ്രന്‍ എന്നിവര്‍ പ്രതിഷേധത്തിനു നേതൃത്വമേകി.സിഐയുടെ നടപടിക്കെതിരെ നിയമനടപടിക്കു ഒരുങ്ങുകയാണ് പ്രദേശവാസികള്‍.
പ്രതികരിക്കാൻ ഇവിടെ എഴുതുക: