കായല്‍ സൗന്ദര്യം നുകര്‍ന്ന് മദ്ധ്യപ്രദേശ് മുഖ്യമന്ത്രി മടങ്ങി

ആലപ്പുഴ: രണ്ടുദിവസത്തെ സന്ദര്‍ശനത്തിനെത്തിയ മദ്ധ്യപ്രദേശ് മുഖ്യമന്ത്രി ശിവരാജ് സിങ് ചൗഹാന്‍ ബോട്ട് സവാരി നടത്തി. ബുധനാഴ്ച രാവിലെ രവികരുണാകരന്‍ മ്യൂസിയം സന്ദര്‍ശിച്ച് കയറിന്റെ ഉത്പന്നങ്ങളുടെ മാഹാത്മ്യം ചോദിച്ചറിഞ്ഞു. ‘കേരള മോഡല്‍’ ആരോഗ്യരംഗത്തെ വിജയത്തെക്കുറിച്ച് കേരള മെഡിക്കല്‍ ടീമിനെ നയിച്ച ഡോ. കെ. വേണുഗോപാലിനോടു വിശദമായി ചോദിച്ചറിഞ്ഞു. കുട്ടനാടു യാത്രയ്‌ക്കിടെ ചിത്തിര കായല്‍ നിലങ്ങളും സന്ദര്‍ശിച്ചു. കുടുംബങ്ങളോടൊപ്പമുള്ള യാത്ര അത്യധികം സന്തോഷപ്രദമായിരുന്നുവെന്ന് അഭിപ്രായപ്പെട്ടാണ് അദ്ദേഹം ബുധനാഴ്ച കൊച്ചി വഴി മടങ്ങിയത്. പേഴ്‌സണല്‍ ഡോക്ടറായ ഡോ. ആര്‍.കെ. റായും കേരള മെഡിക്കല്‍ ടീമിനൊപ്പം ഉണ്ടായിരുന്നു. കേരളാ നഴ്‌സുമാരുടെ ലോകമെമ്പാടുമുള്ള ആത്മാര്‍ത്ഥ സേവനത്തെ പ്രകീര്‍ത്തിക്കുവാനും അദ്ദേഹം മറന്നില്ല.