ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ ചെല്‍സിയുടെ കുതിപ്പിന് സണ്ടര്‍ലാന്റിന്റെ തട. സ്വന്തം തട്ടകത്തില്‍ പന്തുതട്ടിയ സണ്ടര്‍ലാന്റ് നീലപ്പടയെ ഗോള്‍ രഹിത സമനിലയില്‍ തളച്ചു. എങ്കിലും പോയിന്റ് ടേബിളില്‍ ചെല്‍സി (33) ഒന്നാംസ്ഥാനത്തു തുടര്‍ന്നു.
ഡീഗോ കോസ്റ്റയടക്കമുള്ള പ്രമുഖരെ അണിനിരത്തിയിട്ടും ചെല്‍സിക്ക് സണ്ടര്‍ലാന്റിന്റെ പ്രതിരോധപ്പൂട്ട് പൊളിക്കാനായില്ല. ചെല്‍സിയുടെ വില്യന്റെയും സണ്ടര്‍ലാന്റിന്റെയും സാന്റിയാഗോ വെര്‍ജിനിയുടെയും ഷോട്ടുകള്‍ പോസ്റ്റില്‍ തട്ടിത്തെറിച്ചത് ആദ്യ പകുതിയിലെ പ്രധാനകാഴ്‌ച്ചകള്‍. രണ്ടാം പകുതിയില്‍ സണ്ടര്‍ലാന്റിനാണ് മികച്ച അവസരങ്ങള്‍ ലഭിച്ചത്.
പക്ഷേ, അവര്‍ക്കും അക്കൗണ്ട് തുറക്കാന്‍ സാധിച്ചില്ല. കഴിഞ്ഞദിവസം നടന്ന മറ്റു മത്സരങ്ങളില്‍ ആഴ്‌സണല്‍ എതിരില്ലാത്ത ഒരു ഗോളിന് വെസ്റ്റ്‌ബ്രോമിനെയും ലിവര്‍പൂള്‍ സ്റ്റോക്കിനെയും (1-0) മാഞ്ചസ്റ്റര്‍ യുണൈറ്റഡ് ഹള്‍ സിറ്റിയെയും (3-0) തോല്‍പ്പിച്ചു. വെസ്റ്റ് ബ്രോമിനെതിരെ ഗണ്ണേഴ്‌സിനുവേണ്ടി ഡാനി വെല്‍ബക്ക് (60-ാം മിനിറ്റ്) സ്‌കോര്‍ ചെയ്തു. സ്‌റ്റോക്ക് സിറ്റിക്കുമേല്‍ ഗ്ലെന്‍ ജോണ്‍സന്‍ (85) ലിവറിന് ജയമൊരുക്കി.
ക്രിസ് സ്മാളിങ് (16), വെയ്ന്‍ റൂണി (42), റോബിന്‍ വാന്‍ പെഴ്‌സി (66) എന്നിവര്‍ ഹള്ളിന്റെ വലകുലുക്കിയ മാന്‍.യു താരങ്ങള്‍. ജയത്തോടെ മാന്‍.യു (22 പോയിന്റ്) നാലാം സ്ഥാനത്ത് നിലയുറപ്പിച്ചു.
പ്രതികരിക്കാൻ ഇവിടെ എഴുതുക: