മാരാരിക്കുളം: കരകൗശല കടയില്‍ നിന്നും ജീവനക്കാരിയെ കബളിപ്പിച്ച് 3,000 രൂപ തട്ടിയെടുത്ത് യുവാവ് മുങ്ങി. മാരാരിക്കുളം തെക്ക് പഞ്ചായത്ത് 16-ാം വാര്‍ഡ് തെക്കുംതലയ്‌ക്കല്‍ അജിത്തിന്റെ പാതിരപ്പള്ളിയിലെ കരകൗശല വില്‍പ്പനശാലയില്‍ ചൊവ്വാഴ്ചയാണ് തട്ടിപ്പ് നാടകം അരങ്ങേറിയത്. ഏകദേശം 30 വയസ് പ്രായം തോന്നിക്കുന്ന കറുത്ത ഷര്‍ട്ട് ധരിച്ച യുവാവ് കടയിലെത്തി ജീവനക്കാരി ശാന്തിയോട് അജിത്ത് പറഞ്ഞിട്ട് വരികയാണെന്നും അജിത്ത് വാടകയ്‌ക്ക് കൊടുത്തിട്ടുള്ള അടുത്ത ഹോട്ടലില്‍ നിന്നും 3,000 രൂപ വാടക ഇനത്തില്‍ ലഭിക്കാനുണ്ടെന്നും അത് വാങ്ങി നല്‍കണമെന്നും ആവശ്യപ്പെട്ടു.
യുവതിയെ വിശ്വസിപ്പിക്കാന്‍ തട്ടിപ്പുകാരന്‍ ഫോണില്‍ സംസാരിക്കുന്നതായി അഭിനയിക്കുകയും ചെയ്തു. പെണ്‍കുട്ടി ഹോട്ടലില്‍ നിന്നും പണം വാങ്ങി യുവാവിനെ ഏല്‍പ്പിക്കുകയും ചെയ്തു. പണം വാങ്ങിയ തട്ടിപ്പുകാരന്‍ ഉടനെ സ്ഥലം വിട്ടു. പിന്നീട് പണം വാങ്ങി നല്‍കിയ വിവരം ജീവനക്കാരി അജിത്തിനെ അറിയിച്ചതോടെയാണ് തട്ടിപ്പ് പുറത്തായത്. കടയിലെ സിസി ടിവി ദൃശ്യത്തില്‍ തട്ടിപ്പ് നടത്തിയ യുവാവിന്റെ ദൃശ്യം പതിഞ്ഞിട്ടുണ്ട്. മണ്ണഞ്ചേരി പോലീസില്‍ പരാതി നല്‍കി.
പ്രതികരിക്കാൻ ഇവിടെ എഴുതുക: