യാത്രാബോട്ട് നിയന്ത്രണം വിട്ട് കരയിലിടിച്ചു

പൂച്ചാക്കല്‍: യാത്രബോട്ട് അടുപ്പിക്കുന്നതിനിടെ നിയന്ത്രണം വിട്ട് കരയിലിടിച്ചു. കായല്‍ത്തീരത്തോടെ ചേര്‍ന്ന് സ്വകാര്യവ്യക്തി നിര്‍മ്മിച്ചിരുന്ന ഷെഡും തകര്‍ത്തു. ചൊവ്വാഴ്ച വൈകിട്ട് 4.30ന് പൂത്തോട്ടയില്‍ നിന്ന് പാണാവള്ളിയിലേക്ക് സര്‍വീസ് നടത്തിയ ജലഗതാഗതവകുപ്പിന്റെ എസ് 51 എന്ന യാത്രബോട്ടാണ് പാണാവള്ളി ജെട്ടിയില്‍ അടുപ്പിക്കുന്നതിനിടെ നിയന്ത്രണംവിട്ട് കരയിലിടിച്ചത്. ബോട്ട്‌ജെട്ടിക്ക് സമീപം സ്വകാര്യവ്യക്തി നിര്‍മ്മിച്ചിരുന്ന ഷെഡിലും ബോട്ട്  ഇടിച്ചു. ഷെഡിന്റെ ഒരുഭാഗം പൂര്‍ണമായും തകര്‍ന്നു. ബോട്ട് ആടിയുലഞ്ഞെങ്കിലും ബോട്ടിലുണ്ടായിരുന്ന യാത്രക്കാര്‍ക്ക്  അപകടം സംഭവിച്ചില്ല. പാണാവള്ളി ബോട്ട്‌ജെട്ടിയില്‍ ബോട്ടുകള്‍ അടുപ്പിക്കുന്നതിന് ആവശ്യമായ സൗകര്യമില്ലാത്തത് അപകടങ്ങള്‍ക്ക് കാരണമാകുന്നുണ്ട്.