ന്യൂദല്ഹി: ലോകത്തെ ഏറ്റവും പ്രചാരമേറിയ സോഷ്യല് നെറ്റ്വര്ക്കിംഗ് സൈറ്റായ ഫേസ്ബുക്ക് ഹിന്ദി ഉള്പ്പെടെയുള്ള ഭാരതീയ ഭാഷകളിലേക്കും സേവനം വ്യാപിപ്പിച്ചേക്കും. ഇതുസംബന്ധിച്ച ചര്ച്ചകള് ഇന്ന് പ്രധാനമന്ത്രി നരേന്ദ്രമോദിയും ഫേസ്ബുക്ക് സിഇഒ മാര്ക്ക് സുക്കര്ബര്ഗും തമ്മില് നടക്കും. രാവിലെ 10 നാണ് കൂടിക്കാഴ്ച. 11 മണിക്ക് ഐ.ടി. മന്ത്രി രവിശങ്കര് പ്രസാദുമായും സുക്കര്ബര്ഗ് കൂടിക്കാണുന്നുണ്ട്.
അമേരിക്ക കഴിഞ്ഞാല് ലോകത്ത് ഏറ്റവുമധികം ഫേസ്ബുക്ക് ഉപഭോക്താക്കളുള്ള രാജ്യമാണ് ഭാരതം. 12 കോടി ഫേസ്ബുക്ക് അക്കൗണ്ടുകള്. രാജ്യത്തിന്റെ എല്ലാ മേഖലകളിലേക്കും ഇന്റര്നെറ്റ് സേവനം വ്യാപിപ്പിക്കുകയെന്ന ലക്ഷ്യവുമായി മുന്നോട്ടു പോകുന്ന മോദി സര്ക്കാര് മാര്ക്ക് സുക്കര്ബര്ഗ്ഗിന്റെ സേവനങ്ങള് തേടിയിട്ടുണ്ട്. 120 കോടി ജനങ്ങളുള്ള രാജ്യത്ത് 20 കോടി പേരാണ് ഇന്റര്നെറ്റ് ഉപയോഗിക്കുന്നത്. ഇന്റര്നെറ്റ് ഉപഭോക്താക്കളുടെ എണ്ണം 50 കോടിയിലെത്തിക്കുകയാണ് സര്ക്കാര് ലക്ഷ്യം. എന്നാല് ഗ്രാമങ്ങളിലേക്ക് ആവശ്യത്തിന് വൈദ്യുതിയും ഇന്റര്നെറ്റ് കേബിളുകളും എത്തിക്കുകയെന്ന ശ്രമകരമായ ദൗത്യം ഇതിനായി പൂര്ത്തീകരിക്കണം. ഇത്തരം മേഖലകളില് ആഗോള കമ്പനികളെ പങ്കാളികളാക്കാനാണ് സര്ക്കാര് ശ്രമം.
വിദ്യാഭ്യാസം, ഇ-ഗവേര്ണന്സ്, മറ്റടിസ്ഥാന സേവനങ്ങള് എന്നീ മേഖലകളിലും ഫേസ്ബുക്കിന്റെ സഹായം ഭാരതത്തിന് ആവശ്യമുണ്ട്. പെണ്കുട്ടികളുടെ വിദ്യാഭ്യാസം, ഗംഗാ ശുചീകരണം തുടങ്ങിയ പദ്ധതികളിലും ഫേസ്ബുക്ക് പങ്കാളിത്തം ആഗ്രഹിക്കുന്നതായി മുതിര്ന്ന കേന്ദ്രമന്ത്രിസഭാംഗം പറഞ്ഞു. ഫേസ്ബുക്കിനെ ഭാരതീയ ഭാഷകളിലേക്ക് ലഭ്യമാക്കിയാല് ഇത്തരം പദ്ധതികള്ക്ക് അത് ഏറെ സഹായകരമായിരിക്കുമെന്നും കേന്ദ്രസര്ക്കാര് കണക്കുകൂട്ടുന്നു. ഇതുസംബന്ധിച്ച ആദ്യഘട്ട ചര്ച്ചകള് ഫേസ്ബുക്ക് സിഒഒ ഷെറില് സാന്റ്ബെര്ഗുമായി കഴിഞ്ഞയാഴ്ച കേന്ദ്രസര്ക്കാര് നടത്തിയിരുന്നു.
ഭാരതത്തിന്റെ വികസനത്തിനായി വന്കിട കോര്പ്പറേറ്റുകളെ പങ്കാളികളാക്കാനുള്ള പ്രധാനമന്ത്രി നരേന്ദ്രമോദിയുടെ നയപരിപാടികളുടെ ഭാഗമായി കോര്പ്പറേറ്റ് മേധാവിമാര് മോദിയുമായി ചര്ച്ചകള് നടത്തിയിരുന്നു. അമേരിക്കന് സന്ദര്ശന വേളയില് നിരവധി സിഇഒമാരുമായി നടത്തിയ ചര്ച്ചകളുടെ തുടര്ച്ചയയായി ദല്ഹിയില് തിരികെ എത്തിയ ശേഷവും പ്രധാനമന്ത്രി കോര്പ്പറേറ്റ് മേധാവിമാരുമായുള്ള ചര്ച്ചകള് തുടരുകയാണ്. മൈക്രോസോഫ്റ്റ് സിഇഒ സത്യ നദേല, ആമസോണ് സിഇഒ ജെഫ് ബെസോസ് എന്നിവര് കഴിഞ്ഞ ദിവസം മോദിയുമായി കൂടിക്കാഴ്ച നടത്തിയിരുന്നു.
