അഫ്‌ഗാനില്‍ രണ്ടാംഘട്ട വോട്ടെടുപ്പ് തുടങ്ങി

കാബൂള്‍: അഫ്ഗാനിസ്ഥാനില്‍ പ്രസിഡന്റ് തെരഞ്ഞെടുപ്പിന്റെ രണ്ടാം ഘട്ടം ആരംഭിച്ചു. മുന്‍ വിദേശകാര്യ മന്ത്രി അബ്ദുല്ല അബ്ദുല്ല, മുന്‍ ലോകബാങ്ക് ഉദ്യോഗസ്ഥന്‍ അശ്റഫ് ഗനി എന്നിവരാണ് ഹമീദ് കര്‍സായിയുടെ പിന്‍ഗാമിയാവാന്‍ മത്സരിക്കുന്നത്. ഏപ്രില്‍ അഞ്ചിന് നടന്ന തെരഞ്ഞെടുപ്പില്‍ ഇരു സ്ഥാനാര്‍ത്ഥികള്‍ക്കും 50 ശതമാനം വോട്ട് ലഭിക്കാത്തതിനാലാണ് രണ്ടാം ഘട്ട തെരഞ്ഞെടുപ്പ് നടത്തുന്നത്.

ആദ്യഘട്ടത്തില്‍ അബ്ദുല്ല ആകെ പോള്‍ ചെയ്തതതില്‍ 45ശതമാനവും അശ്റഫ് ഗനി 31.7 ശതമാനവും വോട്ടാണ് നേടിയത്. മന്ദഗതിയിലാണ് രണ്ടാംഘട്ട പോളിങ് നടക്കുന്നത്. ഇരു സ്ഥാനാര്‍ത്ഥികളും പ്രസിഡന്‍റ് ഹമീദ് കര്‍സായിയും രാവിലത്തെന്നെ തങ്ങളുടെ വോട്ട് രേഖപ്പെടുത്തി. ജൂലൈ രണ്ടിന് ആദ്യഘട്ട ഫലപ്രഖ്യാപനമുണ്ടാകും. ജൂലൈ 22നായിരിക്കും അന്തിമ ഫലപ്രഖ്യാപനം.

തെരഞ്ഞെടുപ്പുമായി ബന്ധപ്പെട്ട് കനത്ത സുരക്ഷയാണ് രാജ്യത്ത് ഏര്‍പ്പെടുത്തിയിരിക്കുന്നത്. 200,000 സൈനികരെ രാജ്യത്തുടനീളം വിന്യസിച്ചിട്ടുണ്ട്. തെരഞ്ഞെടുപ്പ് അട്ടിമറിക്കുമെന്ന് താലിബാന്റെ ഭീഷണിയുണ്ട്. അമേരിക്കന്‍ സ്പോണ്‍സേഡ് തെരഞ്ഞെടുപ്പാണെന്ന് ആരോപിച്ചാണ് താലിബാന്റെ ആക്രമണ ഭീഷണി. അതേസമയം പോളിങ് ആരംഭിച്ചതിന് ശേഷം കാബൂളില്‍ റോക്കറ്റ് ആക്രമണം ഉണ്ടായതായി അല്‍ ജസീറ റിപ്പോര്‍ട്ട് ചെയ്തു.