സിലിഗുരി: സന്തോഷ്‌ ട്രോഫി ഫുട്ബോളില്‍ കേരളത്തിന്‌ തകര്‍പ്പന്‍ വിജയം. മറുപടിയില്ലാത്ത നാല്‌ ഗോളുകള്‍ക്കാണ്‌ കേരളം ദുര്‍ബലരായ ഉത്തരാഖണ്ഡിനെ തകര്‍ത്തെറിഞ്ഞത്‌. കേരളത്തിന്റെ ആദ്യ വിജയമാണിത്‌. ആദ്യ മത്സരത്തില്‍ കേരളം മിസോറാമിനോട്‌ ഒന്നിനെതിരെ മൂന്ന്‌ ഗോളുകള്‍ക്ക്‌ പരാജയപ്പെട്ടിരുന്നു.
കേരളം സമ്പൂര്‍ണ്ണ ആധിപത്യം പുലര്‍ത്തിയ പോരാട്ടത്തില്‍ 12-ാ‍ം മിനിറ്റില്‍ ജിപ്സനാണ്‌ ആദ്യം ഗോള്‍ നേടിയത്‌. പിന്നീട്‌ സുഹൈര്‍ രണ്ട്‌ തവണ ഉത്തരാഖണ്ഡ്‌ വല കുലുക്കിയതോടെ കേരളം ആദ്യപകുതിയില്‍ 3-0ന് മുന്നിലെത്തി. രണ്ടാം പകുതി ആരംഭിച്ച്‌ ആദ്യ മിനിറ്റില്‍ തന്നെ നസ്‌റുദ്ദീനും എതിര്‍ വല കുലുക്കിയതോടെ കേരളത്തിന്റെഗോള്‍ പട്ടിക പൂര്‍ത്തിയായി.
ആദ്യ മത്സരത്തില്‍ മിസോറാമിന്റെ പവര്‍ ഗെയിമിന്‌ മുന്നില്‍ എല്ലാം നഷ്ടപ്പെട്ട്‌ ദയനീയ പരാജയംഏറ്റുവാങ്ങിയ കേരളത്തിന്റെ ശക്തമായ തിരിച്ചുവരവിനാണ്‌ ഉത്തരാഖണ്ഡിനെതിരായ പോരാട്ടം സാക്ഷ്യം വഹിച്ചത്‌. ഉത്തരാഖണ്ഡിന്റെ തുടര്‍ച്ചയായ രണ്ടാം പരാജയമാണിത്‌. ആദ്യമത്സരത്തില്‍ മഹാരാഷ്‌ട്രയുമായി 3-2ന് അവര്‍ പരാജയപ്പെട്ടിരുന്നു.
അടുത്ത മത്സരങ്ങളില്‍ മാര്‍ച്ച്‌ രണ്ടിന്‌ മഹാരാഷ്‌ട്രയെയും മാര്‍ച്ച്‌ നാലിന്‌ സര്‍വീസസിനെയും കേരളം നേരിടും.
പ്രതികരിക്കാൻ ഇവിടെ എഴുതുക: