കൊച്ചി : സ്റ്റാര്‍ ഇന്ത്യയുടെ ജനശ്രദ്ധ പിടിച്ചു പറ്റിയ സത്യമേവ ജയതേ ടെലിവിഷന്‍ ഷോയുടെ ദക്ഷിണേന്ത്യയിലെ ബ്രാന്‍ഡ്‌ അംബാസിഡറായി നടന്‍ മോഹന്‍ലാലിനെ നിയോഗിച്ചു.
സത്യമേവ ജയതേ യുടെ പുതിയ സീസണ്‍ മാര്‍ച്ച്‌ രണ്ടിനാണ്‌ ആരംഭിക്കുന്നത്‌. അന്ന്‌ രാവിലെ 11 മണിക്ക്‌ ഏഷ്യാനെറ്റ്‌, സ്റ്റാര്‍ പ്ലസ്‌, സ്റ്റാര്‍ പ്രവാഹ്‌, സ്റ്റാര്‍ വിജയ്‌, സ്റ്റാര്‍ ഉത്സവ്‌, ഡിഡി എന്നീ ചാനലുകളില്‍ ഷോ ഉണ്ടായിരിക്കുന്നതാണ്‌. ഉച്ചയ്‌ക്ക്‌ ഒരു മണിക്കാണ്‌ ഇടിവിയില്‍ പരിപാടി സംപ്രേക്ഷണം ചെയ്യുക.
ദേശീയ തലത്തില്‍ അമിര്‍ ഖാന്‍ ബ്രാന്റ്‌ അംബാസഡറായ സത്യമേവ ജയതേ ഷോയില്‍ രാജ്യത്തെ ബാധിക്കുന്ന സുപ്രധാന സാമൂഹ്യ പ്രശ്നങ്ങളാണ്‌ ചര്‍ച്ച ചെയ്യപ്പെടുന്നത്‌. ഷോയില്‍ ഉയര്‍ത്തിക്കാട്ടുന്ന വിഷയങ്ങള്‍ രാജ്യത്തെ ഓരോ പൗരനേയും ബാധിക്കുന്നവയാണെന്നിരിക്കെ മോഹന്‍ലാലിന്റെ വരവ്‌ ദക്ഷിണേന്ത്യയില്‍ മാത്രമല്ല, ഇന്ത്യയുടെ ഇതര ഭാഗങ്ങളിലും ഈ പരിപാടിക്ക്‌ കൂടുതല്‍ പ്രേക്ഷകരെ സൃഷ്ടിക്കാന്‍ സഹായകമാകുമെന്നാണ്‌ കരുതുന്നതെന്ന്‌ സ്റ്റാര്‍ ഇന്ത്യ ചീഫ്‌ എക്സിക്യൂട്ടീവ്‌ ഓഫീസര്‍ ഉദയ്‌ ശങ്കര്‍ പറഞ്ഞു.
പ്രതികരിക്കാൻ ഇവിടെ എഴുതുക: