ന്യൂദല്‍ഹി: കേരളത്തില്‍ വയനാട്ടില്‍ സ്പൈസസ്‌ പാര്‍ക്കിന്‌ കേന്ദ്രാനുമതി ലഭിച്ചതായി മുഖ്യമന്ത്രി ഉമ്മന്‍ചാണ്ടി അറിയിച്ചു. ഇതിനായി വയനാട്ടില്‍ 10 ഏക്കര്‍ സ്ഥലം സംസ്ഥാന സര്‍ക്കാര്‍ കണ്ടെത്തി നല്‍കുമെന്നും മുഖ്യമന്ത്രി പറഞ്ഞു. കേന്ദ്ര വാണിജ്യ- വ്യവസായ മന്ത്രി ആനന്ദ് ശര്‍മ്മയുമായി ചര്‍ച്ച നടത്തിയ ശേഷം ദല്‍ഹിയില്‍ മാധ്യമപ്രവര്‍ത്തകരോട്‌ സംസാരിക്കുകയായിരുന്നു അദ്ദേഹം.
സംസ്ഥാന സര്‍ക്കാര്‍ നേരത്തെ ഉന്നയിച്ച ഈ ആവശ്യം കേന്ദ്രസര്‍ക്കാര്‍ അംഗീകരിക്കുകയായിരുന്നു. കൊച്ചിയില്‍ കണ്‍വെന്‍ഷന്‍ സെന്റര്‍ തുടങ്ങണമെന്ന ആവശ്യവും കേന്ദ്ര സര്‍ക്കാര്‍ അംഗീകരിച്ചിട്ടുണ്ട്‌. കണ്‍വെന്‍ഷന്‍ സെന്ററിനു വേണ്ടി കാക്കനാട്‌ കിന്‍ഫ്രയുടെ സ്ഥലം വിട്ടുനല്‍കുമെന്നും മുഖ്യമന്ത്രി പറഞ്ഞു.
റബ്ബറിന്റെ വില ഇടിയുന്ന സാഹചര്യത്തില്‍ റബ്ബര്‍ കര്‍ഷകരുടെ ആശങ്കകള്‍ പരിഹരിക്കാന്‍ നികുതിയില്‍ മാറ്റങ്ങള്‍ വരുത്തണമെന്ന്‌ കേരളം ആവശ്യപ്പെട്ടിട്ടുണ്ട്‌. കേന്ദ്ര വാണിജ്യ മന്ത്രാലയം മുന്‍കയ്യെടുത്ത്‌ റബ്ബര്‍ സംഭരിക്കുക, കേരളത്തില്‍ റബ്ബര്‍ സംഭരിക്കുന്നതിനുളള സാമ്പത്തിക സഹായം സംസ്ഥാനത്തിന്‌ നല്‍കുക എന്നീ രണ്ട്‌ ആവശ്യങ്ങള്‍ കേന്ദ്രസര്‍ക്കാരിനോട്‌ ഉന്നയിച്ചു. കേന്ദ്ര സര്‍ക്കാരിന്റെ ഏതെങ്കിലും ഏജന്‍സി വഴി റബ്ബര്‍ സംഭരിക്കാനുളള സാധ്യത പരിശോധിക്കാന്‍ കേന്ദ്രമന്ത്രി ഉദ്യോഗസ്ഥര്‍ക്ക്‌ നിര്‍ദ്ദേശം നല്‍കിയിട്ടുണ്ട്‌. സംസ്ഥാത്തിന്‌ ധനസഹായം നല്‍കാനാവില്ലെന്ന്‌ കേന്ദ്രസര്‍ക്കാര്‍ വ്യക്തമാക്കിയിട്ടുണ്ട്‌. സ്വന്തം നിലയില്‍ റബ്ബര്‍ സംഭരണം നടത്തുന്നതിനായി വിവിധ ഏജന്‍സികളുമായി സംസ്ഥാന സര്‍ക്കാര്‍ മുന്‍കയ്യെടുത്ത്‌ ചര്‍ച്ചകള്‍ നടത്തും.
റബ്ബര്‍ സംഭരണത്തിനായി ബജറ്റില്‍ 10 കോടി രൂപ നീക്കിവെച്ചിട്ടുണ്ട്‌. ആവശ്യമെങ്കില്‍ ഈ തുക ഇനിയും വര്‍ദ്ധിപ്പിക്കും. അന്തര്‍ദ്ദേശീയ മാര്‍ക്കറ്റില്‍ വന്ന വില തകര്‍ച്ച ചെറിയ ഇടവേളയാണ്‌. ഈ സാഹചര്യത്തില്‍ റബ്ബര്‍ സംഭരിച്ച്‌ പിന്നീട്‌ വില്‍ക്കുന്നതിലൂടെ കര്‍ഷകരുടെ ആശങ്കകള്‍ പരിഹരിക്കാനാകുമെന്നും മുഖ്യമന്ത്രി അഭിപ്രായപ്പെട്ടു.
പ്രതികരിക്കാൻ ഇവിടെ എഴുതുക: