ഹൈദരാബാദ്‌: തെലുങ്ക്‌ നടന്‍ ഉദയ്‌ കിരണിനെ മരിച്ച നിലയില്‍ കണ്ടെത്തി. ശ്രീനഗര്‍ കോളനിയിലെ ഫ്ലാറ്റിനുള്ളില്‍ തൂങ്ങി മരിച്ച നിലയില്‍ കണ്ടെത്തുകയായിരുന്നു. കിരണിന്റെ ഭാര്യയും അയല്‍വാസികളും ചേര്‍ന്ന്‌ ആശുപത്രിയില്‍ എത്തിച്ചെങ്കിലും മരണം സംഭവിച്ചിരുന്നു. ആത്മഹത്യയുടെ കാരണം വ്യക്തമായിട്ടില്ല.
ഞായറാഴ്ച രാത്രി ഫ്ലാറ്റില്‍ ഒറ്റക്കായിരുന്നു കിരണ്‍. ജോലിക്കായി പുറത്തുപോയിരുന്ന ഭാര്യ മൊബെയിലില്‍ വിളിച്ചിട്ടും എടുക്കാതിരുന്നതിനെതുടര്‍ന്ന്‌ വീട്ടിലെത്തിയപ്പോഴാണ്‌ കിരണിനെ മരിച്ച നിലയില്‍ കണ്ടെത്തിയത്‌. 2003-ല്‍ കേന്ദ്രമന്ത്രി ചിരഞ്ജീവിയുടെ മകളുമായി കിരണിന്റെ വിവാഹം നിശ്ചയിച്ചിരുന്നു. എന്നാല്‍ പിന്നീട്‌ വിവാഹം മുടങ്ങി. സിനിമയില്‍ കിരണ്‍ സജീവമായെങ്കിലും മിക്കവയും പരാജയമായിരുന്നു.
2000-ത്തില്‍ പുറത്തിറങ്ങിയ ചിത്രം എന്ന സിനിമയിലൂടെയാണ്‌ കിരണ്‍ അഭിനയ രംഗത്തേക്ക്‌ കടന്നുവന്നത്‌. 21 സിനിമകളില്‍ ഇതുവരെ അഭിനയിച്ചിട്ടുണ്ട്‌. ഫിലിം ഫെയര്‍ അവാര്‍ഡ്‌ ഉള്‍പ്പെടെയുള്ള പുരസ്കാരങ്ങള്‍ ലഭിച്ചിട്ടുള്ള കിരണ്‍ പൊയ്‌ എന്ന തമിഴ്‌ സിനിമയിലും അഭിനയിച്ചു. മൂന്നോളം തമിഴ്‌ സിനിമകളില്‍ അഭിനയിച്ച കിരണ്‍ 2012-ലാണ്‌ കാമുകിയായ വിശിഷ്ടയെ വിവാഹം ചെയ്തത്‌.
അടുത്തകാലത്തായി ഉദയ്‌ കിരണ്‍ അഭിനയിച്ച സിനിമകളെല്ലാം കനത്ത പരാജയമായിരുന്നു. നുവ്വു നേനു, നീക്കു നേനു നാക്കു നുവ്വു, ലവ്‌ ടു ഡേ, ശ്രീറാം, ഹോളി, നീ സ്നേഹം, ജോഡി നമ്പര്‍ തുടങ്ങിയവയാണ്‌ കിരണിന്റെ ശ്രദ്ധേയ സിനിമകള്‍.
പ്രതികരിക്കാൻ ഇവിടെ എഴുതുക: