കോട്ടയം : ഏഴ് വയസ്സുള്ള രണ്ടാം ക്ലാസ്സ് വിദ്യാര്ത്ഥിയും ചിത്രകാരനുമായ വി.എസ്. സന്ദീപിന്റെ ‘മൈ കിന്ഡര്ഗാര്ട്ടന് മെമ്മറീസ്’ എന്ന ചിത്രപ്രദര്ശനം ശിശുദിനാചരണത്തിന്റെ ഭാഗമായി തിരുവഞ്ചൂര് ജുവനൈല് ഹോമില് നടത്തപ്പെടുന്നു. എറണാകുളം ദര്ബാറില് ഹാളിലും വിവിധ സ്കൂളുകളിലുമായി കേരളത്തിലാകമാനം 100 ദിവസങ്ങളിലായി സന്ദീപ് നടത്തിവരുന്ന ചിത്രപ്രദര്ശനത്തിന്റെ ഭാഗമായിട്ടാണ് തിരുവഞ്ചൂര് ജുവനൈല് ഹോമിലെ അന്തേവാസികളായ കുട്ടികള്ക്ക് പ്രചോദനമായി ചിത്രങ്ങള് പ്രദര്ശിപ്പിക്കുന്നത്.
പ്രകൃതിയും ദേവീ ദേവന്മാരും സാമൂഹ്യപരിഷ്കര്ത്താക്കളും വാഹനങ്ങളും പക്ഷിമൃഗാദികളും കാര്ട്ടൂണ് കഥാപാത്രങ്ങളും സുനാമിയുമെല്ലാം ഉള്ക്കൊള്ളുന്ന വിപുല ശേഖരത്തിലെ ആദ്യകാല 50 ചിത്രങ്ങളാണ് പ്രദര്ശിപ്പിക്കുന്നത്. പോസ്റ്റര് കളറും ഓയില് പാസ്റ്ററും ക്രയോണ്സും വാട്ടര്കളറും കളര് പെന്സിലും ആണ് രചനയ്ക്ക് കൂടുതലായി ഉപയോഗിച്ചിട്ടുള്ളത്. കോതമംഗലം വലിയമഠം ഡോ. വി. സജികുമാറിന്റെയും രജിത കെ. നായരുടെയും മകനാണ് സന്ദീപ്. ഏക സഹോദരി ശരണ്യയും ചിത്രകാരിയാണ്. ജുവനൈല് ഹോമില് നടക്കുന്ന ചിത്രപ്രദര്ശന ഉദ്ഘാടനം സ്ഥാപനം സൂപ്രണ്ട് ശ്രീമതി മെര്ളിന് ജോസ് നിര്വ്വഹിക്കും.
പ്രതികരിക്കാൻ ഇവിടെ എഴുതുക: