ഈശ്വരന് വേണ്ടി ജീവന്പോലും ത്യജിക്കാന് സന്നദ്ധരാകണം. സത്യത്തെ മുറുകെ പിടിക്കുക, ധര്മം ആചരിക്കുക. ഈ രണ്ട് ഗുണവശങ്ങളാണ് മനുഷ്യന് അവനവനില് നട്ടുവളര്ത്തേണ്ടത്. വേദങ്ങള് പഠിപ്പിക്കുന്നു ‘സത്യം വദ, ധര്മ്മം ചര’ ഒരിക്കലും, ഏത് പരിതഃസ്ഥിതിയിലും സത്യം ഉപേക്ഷിക്കരുത്, ജീവന് കൊടുത്തും സത്യം പരിപാലിക്കണം. ഹരിശ്ചന്ദ്രനെ മാതൃകയാക്കൂ. കടുത്തപ്രയാസങ്ങളെ അഭിമുഖീകരിക്കുമ്പോഴും അദ്ദേഹത്തിന് ഈശ്വരനിലും സത്യത്തിലും ഉള്ള വിശ്വാസം തെല്ലും ഇടറിയില്ല. അവസാനം സത്യം തന്നെ അദ്ദേഹത്തെ രക്ഷിച്ചു. അദ്ദേഹത്തിന് രാജ്യവും സമ്പത്തും തിരികെ ലഭിക്കുകയും ചെയ്തു.
സത്യത്തെ നിലനിര്ത്തുന്നത് എന്താണ്? അതാണ് പ്രേമം. അതിനാല് പ്രേമം വളര്ത്തുക, വികസിപ്പിക്കുക. പക്ഷേ പ്രേമം നിങ്ങളിലേക്കും നിങ്ങളുടെ കുടുംബത്തിലേക്കും മാത്രമായി ചുരുങ്ങരുത്. നിങ്ങള് നിങ്ങളെക്കുറിച്ചും കുടുംബത്തെക്കുറിച്ചും മാത്രമാണ് ചിന്തിക്കുന്നതെങ്കില് കാട്ടില്പോയി താമസിക്കുന്നതാണ് കൂടുതല് നല്ലത്. അത്തരക്കാര്ക്ക് ഗ്രാമത്തിലോ സമൂഹത്തിലോ താമസിക്കാന് എന്ത് അവകാശമാണുള്ളത്.
സമൂഹത്തില് ജീവിക്കുമ്പോള് അതിന്റെ ക്ഷേമം നിങ്ങളുടെ ഉത്തരവാദിത്വമാണ്. സമൂഹത്തിലെ അംഗമായിരിക്കെ നിങ്ങള് സദാ നിങ്ങളുടെ കുടുംബത്തെക്കുറിച്ച് മാത്രം ചിന്തിക്കുകയാണെങ്കില് നിങ്ങള് മാറാരോഗം കൊണ്ട് ദുരിതമനുഭവിക്കുന്ന ഒരു വ്യക്തിയേക്കാള് ഒട്ടും മെച്ചമല്ല.
– ശ്രീ സത്യസായിബാബ
