കൊച്ചി: വിദേശഇന്ത്യക്കാര്‍ക്കും പ്രവാസി മലയാളികള്‍ക്കുമായി വൈവിധ്യമാര്‍ന്ന സേവനങ്ങള്‍ ലഭ്യമാക്കുന്നതിനായി പ്രവാസി ഫ്രണ്ട്‌ എന്ന പേരില്‍ പുതിയൊരു സംരംഭം രൂപംകൊണ്ടു. അവരവരുടെ പ്രദേശത്ത്‌ ലഭ്യമാകേണ്ട എല്ലാ സേവനങ്ങളും ഇതുവഴി ലഭ്യമാകും. പ്രവാസികളല്ലാത്തവര്‍ക്കും പ്രാദേശികമായി ഈ സേവനം പ്രയോജനപ്പെടുത്താം.
മുന്‍ രഞ്ജി ട്രോഫി ക്രിക്കറ്റ്‌ താരവും കേരള ക്രിക്കറ്റ്‌ ടീം സെലക്ടറുമായ എസ്. മനോജ്‌, രണ്ടു പതിറ്റാണ്ടിലേറെയായി ഡിസ്ട്രിബ്യൂഷന്‍ ബിസിനസ്‌ രംഗത്ത്‌ സജീവമായ പി.ആര്‍. ഗണേഷ്‌ എന്നിവര്‍ ചേര്‍ന്നാണ്‌ കൊച്ചിയില്‍ പ്രവാസി ഫ്രണ്ടിന്‌ രൂപം കൊടുത്തിരിക്കുന്നത്‌.
വിദേശ ഇന്ത്യക്കാരും കേരളത്തിനു പുറത്ത്‌ താമസിക്കുന്ന മലയാളികളും നാട്ടിലെത്തുമ്പോള്‍ സര്‍ക്കാര്‍ വകുപ്പുകളുടെ സേവനത്തിനും ആരോഗ്യസംബന്ധമായ കാര്യങ്ങള്‍ക്കും വിശ്വാസപരമായ കാര്യങ്ങള്‍ക്കും യാത്രാ സൗകര്യങ്ങള്‍ക്കും റിയല്‍ എസ്റ്റേറ്റ്‌ വില്‍ക്കല്‍ വാങ്ങലുകള്‍ക്കുമെല്ലാം ഒട്ടേറെ ബുദ്ധിമുട്ടുകള്‍ അനുഭവിക്കുന്നുണ്ടെന്ന്‌ പ്രവാസി ഫ്രണ്ട്‌ സ്ഥാപകന്‍ എസ്. മനോജ്‌ ചൂണ്ടിക്കാട്ടി.
കുറഞ്ഞ കാലത്തേയ്‌ക്കു മാത്രം നാട്ടിലെത്തുന്ന പ്രവാസികള്‍ക്ക്‌ ഇത്തരം കാര്യങ്ങള്‍ക്ക്‌ സമയം കണ്ടെത്താന്‍ കഴിയാതെ വരുന്നു. അതിനപ്പുറം കാര്യങ്ങള്‍ കൃത്യമായി നിര്‍വഹിക്കാന്‍ കഴിയാതെ വിഷമിക്കുന്നു. ഇതിനെല്ലാം പരിഹാരമായാണ്‌ പ്രവാസി ഫ്രണ്ട്‌ പ്രവര്‍ത്തിക്കുന്നത്‌.
പ്രതികരിക്കാൻ ഇവിടെ എഴുതുക: