കൊച്ചി: റോമിങ്‌ നിരക്ക്‌ കുറച്ച്‌ രാജ്യത്തെ പ്രമുഖ ടെലികമ്യൂണിക്കേഷന്‍ സേവന ദാതാക്കളായ വോഡഫോണ്‍ പുതിയ ഓഫറുകള്‍ പ്രഖ്യാപിച്ചു. അഞ്ചു രൂപയുടെ സ്പെഷ്യല്‍ റിചാര്‍ജ്‌ വൗച്ചറില്‍ (എസ്ടിവി) പ്രി-പെയ്ഡ്‌ വരിക്കാര്‍ക്ക്‌ ഒരു ദിവസം മുഴുവന്‍ സൗജന്യ റോമിങ്‌ ഇന്‍കമിങ്‌ ലഭിക്കുന്നതാണ്‌ ഓഫറുകളില്‍ ഒന്ന്‌. ഈ പ്ലാനില്‍ റോമിങ്‌ ഔട്ട്ഗോയിങ്‌ നിരക്ക്‌ സെക്കന്‍ഡിന്‌ 1.5 പൈസയായിരിക്കും. പ്ലാന്‍ ആക്റ്റിവേറ്റ്‌ ചെയ്യുന്നതിന്‌ പ്രിപെയ്ഡ്‌ വരിക്കാര്‍ *444*500# എന്ന്‌ ഡയല്‍ ചെയ്യണം. സൗജന്യ ഇന്‍കമിങ്‌ കോളുകള്‍ ലഭിക്കുന്നതിന്‌ പ്രി-പെയ്ഡ്‌ വരിക്കാര്‍ക്ക്‌ മാസത്തില്‍ 71 രൂപ മുതലുള്ള പ്ലാനുകളും പോസ്റ്റ്‌-പെയ്ഡ്‌ വരിക്കാര്‍ക്ക്‌ 75 രൂപ മുതലുള്ള പ്ലാനുകളും ഇതോടൊപ്പം വോഡഫോണ്‍ പ്രഖ്യാപിച്ചു.
ഇതുകൂടാതെ, റോമിങ്‌ ടാരിഫ്‌ പ്ലാന്‍ (ആര്‍ടിപി), റോമിങ്‌ ടാരിഫ്‌ പ്ലാന്‍ ഫ്രീ (ആര്‍ടിപിഎഫ്‌ആര്‍) എന്നീ ആകര്‍ഷകമായ പ്ലാനുകളും പ്രി-പെയ്ഡ്‌, പോസ്റ്റ്‌-പെയ്ഡ്‌ വരിക്കാര്‍ക്കായി വോഡഫോണ്‍ പ്രഖ്യാപിച്ചിട്ടുണ്ട്‌. കുറഞ്ഞ റോമിങ്‌ നിരക്കാണ്‌ റോമിങ്‌ ടാരിഫ്‌ പ്ലാനില്‍ വരുന്നത്‌. ഫ്രീ പ്ലാനില്‍ റോമിങ്‌ സൗകര്യം സൗജന്യമായിരിക്കും. പ്രി-പെയ്ഡ്‌ വരിക്കാര്‍ക്കുള്ള ഫ്രീ പ്ലാന്‍ 196 രൂപ മുതലാണ്‌ ആരംഭിക്കുന്നത്‌. പോസ്റ്റ്പെയ്ഡ്‌ വരിക്കാര്‍ക്ക്‌ 149 രൂപ മുതലും പ്ലാന്‍ ആരംഭിക്കുന്നു. സംസ്ഥാനങ്ങള്‍ക്കനുസരിച്ച്‌ നിരക്കില്‍ നേരിയ വ്യത്യാസമുണ്ടാവും.
പ്രതികരിക്കാൻ ഇവിടെ എഴുതുക: