മുണ്ടക്കയം: മദ്യലഹരിയിലെത്തിയ സംഘം യുവാവിനെ മര്ദ്ദിച്ച് മാലകവര്ന്ന കേസില് മൂന്നു പേര്പിടിയില്. ഏന്തയാര് സ്വദേശികളായ മാത്തുമല കോളനിയില് പുതുപ്പറമ്പില് സുനില് (24) കദളിക്കാലായില് ബിബിന് (21), പുതുപ്പറമ്പില് സിനു (27) എന്നിവരെയാണ് മുണ്ടക്കയം എസ്.ഐ എം.കെ മോഹനന് ഗ്രേഡ് എസ്.ഐ കെ.എച്ച് നാസര് എന്നിവരടങ്ങുന്ന സംഘം പിടികൂടിയത്.
കഴിഞ്ഞ മാര്ച്ച് 17 ന് ഏന്തയാര് ടൗണിലെ ജീപ്പ് ഡ്രൈവറായ ജിജോ (31) യെ മര്ദ്ദിച്ച കേസിലാണ് ഇവര് പിടിയിലായത്. ഏന്തയാറ്റില് നിന്നും മാത്തുമലയ്ക്ക് ഓട്ടം പോയ ജിജോ യാത്രക്കാര് തിരിച്ചുവരുന്നതിനായി കാത്തു നിലക്കുന്നതിനിടയിലാണ് അതുവഴി വന്ന മൂവര്സംഘം ജിജോയെ മര്ദ്ദിച്ചത്. ഈ സമയം ആവഴിവന്ന കദളിക്കാട്ടില് ഷിബു (32) മര്ദ്ദനം തടയാന് ശ്രമിച്ചെങ്കിലും മൂവര്സംഘം ഷിബുവിനെയും മര്ദ്ദിച്ച് അവശനാക്കി. ജിജോയുടെ രണ്ടുപവന്റെ മാലയും കൈവശമുണ്ടായിരുന്ന 1200 രൂപയും സംഘം കവര്ന്നു. തുടര്ന്ന് അക്രമത്തില് പ്രതിഷേധിച്ച് ഒട്ടേറെ വാഹനങ്ങള് പണിമുടക്കിയും വ്യാപാരസ്ഥാപനങ്ങള് അടച്ചിട്ടും ഹര്ത്താല് നടത്തിയിരുന്നു. സംഭവത്തിന് ശേഷം പ്രതികള് ഒളിവില് പോവുകയും തുടര്ന്ന് നടത്തിയ അന്വേഷണത്തില് വ്യാഴാഴ്ച ഇവര് പോലീസ് പിടിയിലാവുകയുമായിരുന്നു. അറസ്റ്റ് ചെയ്ത ഇവരെ കോടതിയില് ഹാജരാക്കി റിമാന്റ് ചെയ്തു.
പ്രതികരിക്കാൻ ഇവിടെ എഴുതുക: