പെരുമ്പാവൂര്‍: ആഭ്യന്തരവകുപ്പ്‌ മന്ത്രി തിരുവഞ്ചൂര്‍ രാധാകൃഷ്ണനെ പെരുമ്പാവൂരിലെ കോണ്‍ഗ്രസ്‌ ‘ഐ’ വിഭാഗം ഒന്നടങ്കം ബഹിഷ്കരിച്ചു. കഴിഞ്ഞദിവസം വെങ്ങോല പ്ലാവിന്‍ചുവടില്‍ ഐഎന്‍ടിയുസി യൂണിയന്‍ വാര്‍ഷിക സമ്മേളനത്തില്‍ മന്ത്രി പങ്കെടുത്തപ്പോഴാണ്‌ ഐ വിഭാഗം പുറംതിരിഞ്ഞ്‌ നിന്നത്‌.
കോണ്‍ഗ്രസ്‌ ഭരണം നടത്തുന്ന പഞ്ചായത്തായിരുന്നിട്ടുപോലും ഐ വിഭാഗക്കാരായ ഒരു പഞ്ചായത്തംഗംപോലും വേദിയിലോ സദസിലോ ഉണ്ടായിരുന്നില്ല. വെങ്ങോല പഞ്ചായത്ത്‌ നടത്തുന്ന നിര്‍ധനരായ രോഗികളെ സഹായിക്കുന്നതിനുള്ള ഹൃദയതാളം പദ്ധതിയെ പരാജയപ്പെടുത്തുന്നതിന്‌ ഐഎന്‍ടിയുസിയിലെ എ വിഭാഗക്കാര്‍ സംഘടിപ്പിച്ച പരിപാടിയായതിനാലാണ്‌ മന്ത്രിയടക്കമുള്ളവരെ ബഹിഷ്കരിക്കേണ്ടി വന്നതെന്ന്‌ ഐ വിഭാഗക്കാര്‍ പറയുന്നു.
ഐഎന്‍ടിയുസിയുടെ ജില്ലാ നേതൃത്വത്തെയോ കെപിസിസിയുടെ ജില്ലാ നേതൃത്വത്തെയോ അറിയിക്കാതെയാണ്‌ പരിപാടി സംഘടിപ്പിച്ചത്‌. ചില എ വിഭാഗം നേതാക്കള്‍ പൊതുയോഗത്തിന്റെ പേരില്‍ വന്‍ പണപ്പിരിവ്‌ നടത്തിയതായും ഐ വിഭാഗം ആരോപിക്കുന്നു. ഔദ്യോഗിക പരിപാടിയല്ലാത്തതിനാല്‍ ആഭ്യന്തരവകുപ്പ്‌ മന്ത്രി പങ്കെടുക്കില്ലെന്ന്‌ ചില ഐ വിഭാഗം നേതാക്കള്‍ പരസ്യമായി പറഞ്ഞിരുന്നു. എന്നാല്‍ മന്ത്രിയെത്തിയപ്പോള്‍ ബഹിഷ്കരിക്കുകയാണുണ്ടായത്‌. പെരുമ്പാവൂര്‍ മേഖലയിലുള്ള കോണ്‍ഗ്രസിന്റെ നേതാക്കള്‍ നാട്ടിലുണ്ടായിരുന്നിട്ടും ആഭ്യന്തരമന്ത്രിയെ ബഹിഷ്കരിച്ചത്‌ വഴി ഇവിടുത്തെ ഗ്രൂപ്പുപോര്‌ വീണ്ടും സജീവമാകുകയാണ്‌.
പ്രതികരിക്കാൻ ഇവിടെ എഴുതുക: