കൊച്ചി: പട്ടിക വര്‍ഗ വിദ്യാര്‍ഥികള്‍ക്ക്‌ വിദ്യാഭ്യാസാനുകൂല്യങ്ങള്‍ അനുവദിക്കുന്നതിനുള്ള ആധാര്‍ കാര്‍ഡ്‌ ലഭ്യമാക്കുന്നതിന്‌ ജില്ലയുടെ വിവിധ ഭാഗങ്ങളില്‍ ക്യാമ്പുകള്‍ സംഘടിപ്പിക്കുന്നു. ഇതിന്റെ ഭാഗമായി ഇനി പറയുന്ന സ്ഥലങ്ങളില്‍ ക്യാമ്പുകള്‍ നടത്തും.
15-ന്‌ രാവിലെ 10 മുതല്‍ നാല്‌ വരെ എറണാകുളം മഹാരാജാസ്‌ കോളേജ്‌, 19, 20 തിയതികളില്‍ രാവിലെ 10 മുതല്‍ നാല്‌ വരെ കാലടി ശ്രീശങ്കര യൂണിവേഴ്സിറ്റി എന്നിവിടങ്ങളിലാണ്‌ ക്യാമ്പ്‌.
എറണാകുളം, തൃപ്പൂണിത്തുറ, പറവൂര്‍ മേഖലകളിലെ വിദ്യാര്‍ഥികള്‍ക്ക്‌ എറണാകുളം മഹാരാജാസ്‌ കോളേജിലും കാലടി, പെരുമ്പാവൂര്‍, അങ്കമാലി മേഖലകളിലെ സ്ഥാപനങ്ങളില്‍ പഠനം നടത്തുന്ന വിദ്യാര്‍ഥികള്‍ക്ക്‌ കാലടി ശ്രീശങ്കര യൂണിവേഴ്സിറ്റി ക്യാമ്പസിലും ആധാര്‍ കാര്‍ഡിനായി രജിസ്റ്റര്‍ ചെയ്യാം. പാസ്പോര്‍ട്ട്‌ സൈസ്‌ ഫോട്ടോ, വിലാസം തെളിയിക്കുന്നതിനുളള ഏതെങ്കിലും തിരിച്ചറിയല്‍ രേഖ എന്നിവയുമായി വിദ്യാര്‍ഥികള്‍ എത്തിച്ചേരണം. തിരിച്ചറിയല്‍ രേഖയില്ലാത്തവര്‍ ഫോട്ടോയും മേല്‍വിലാസവും സ്ഥാപനമേധാവിയെക്കൊണ്ട്‌ സാക്ഷ്യപ്പെടുത്തി ക്യാമ്പില്‍ എത്തിക്കേണ്ടതാണ്‌. ആധാര്‍ രജിസ്ട്രേഷനുളള ഫോമുകള്‍ ആവശ്യമുളള സ്ഥാപനമേധാവികള്‍ മൂവാറ്റുപുഴ ട്രൈബല്‍ ഡവലപ്മെന്റ്‌ ഓഫീസുമായി ബന്ധപ്പെടണം. ഫോണ്‍: 04852814957.
പ്രതികരിക്കാൻ ഇവിടെ എഴുതുക: