തൃശൂര്‍: ചേര്‍പ്പ്‌ പോലീസ് സഞ്ചരിച്ച പോലീസ് ജീപ്പ്പ്‌ നിയന്ത്രണം വിട്ട്‌ മറിഞ്ഞ് എസ്‌.ഐ. അടക്കം 5 പോലീസുകാര്‍ക്ക്‌ പരിക്ക്. ആരുടേയും പരിക്ക് സാരമുള്ളതല്ല. നിസ്സാര പരിക്കേറ്റ ഇവരെ കൂര്‍ക്കഞ്ചേരി എലൈറ്റ് ആശുപത്രിയില്‍ പ്രവേശിപ്പിച്ചു.
ഇന്നു പുലര്‍ച്ചെ മൂന്നുമണയോടെ ചേര്‍പ്പ്‌ ഹെര്‍ബെര്‍ട്ട്‌ കോളനിക്കു സമീപം പാടത്തേക്കാണ്‌ ജീപ്പ്പ്‌ മറിഞ്ഞത്‌. എസ്‌.ഐ.സുനില്‍രാജ്‌, സി.പി.ഒമാരായ സുധീര്‍, സജിപാല്‍, സുനില്‍, വികാസ്‌ എന്നിവര്‍ക്കാണ്‌ പരിക്കേറ്റത്‌. എസ്‌.ഐയ്‌ക്ക്‌ കൈക്കാണ്‌ പരിക്കേറ്റത്‌.
വികാസ്‌ ആണ്‌ ജീപ്പ്പ്‌ ഓടിച്ചിരുന്നത്‌. ഡ്രൈവര്‍ ഉറങ്ങിയതാണ്‌ അപകടകാരണമെന്ന്‌ സംശയിക്കുന്നു.
പാറക്കോവില്‍ ഉത്സവം കഴിഞ്ഞ്‌ കോമ്പിംഗിന്റെ ഭാഗമായി പരിശോധനയ്‌ക്ക്‌ പോയി മടങ്ങുംവഴിയാണ്‌ അപകടം. റോഡിനോട്‌ ചേര്‍ന്ന്‌ കോണ്‍ക്രീറ്റ്‌ കൈവരിയില്‍ ഇടിച്ച ജീപ്പ്പ്‌ താഴെയുള്ള തോടിനരുകിലേക്ക്‌ മറിഞ്ഞു. കോണ്‍ക്രീറ്റ്‌ ഭിത്തി തകര്‍ന്ന്‌ തോട്ടിലേക്ക്‌ വീണു. അപകടത്തില്‍ ജീപ്പ്പിന്‌ സാരമായി കേടുപാടുകള്‍ സംഭവിച്ചിട്ടുണ്ട്‌. വിവരമറിഞ്ഞെത്തിയ നാട്ടുകാരാണ്‌ രക്ഷാപ്രവര്‍ത്തനങ്ങള്‍ നടത്തിയത്‌.
പ്രതികരിക്കാൻ ഇവിടെ എഴുതുക: