കോട്ടയം: വടവാതൂര്‍ മാലിന്യ പ്രശ്‌നത്തില്‍ കോട്ടയം നഗരസഭയും രാംകി കമ്പിനിയും ഒത്തുകളിച്ച് വടവാതൂരും, കോട്ടയം നഗരത്തെയും മലീമസമാക്കുകയാണെന്ന് യുവമോര്‍ച്ച സംസ്ഥാന പ്രസിഡന്റ് അഡ്വ.വി.വി. രാജേഷ് ആരോപിച്ചു. 2011 ഒക്ടോബര്‍ 15ന് മന്ത്രി തിരുവഞ്ചൂരിന്റെ നേതൃത്വത്തില്‍ എടുത്ത തീരുമാനങ്ങള്‍ കമ്പിനിയും നഗരസഭയും ചേര്‍ന്ന് അട്ടിമറിച്ചിരിക്കുന്നു. ജനുവരി 15ന് മുന്‍പ് ലീച്ച് ട്രീറ്റ്‌മെന്റ് പ്ലാന്റ് സ്ഥാപിക്കും എന്ന വാക്ക് ഇതുവരെ പാലിക്കുവാന്‍ രാംകി കമ്പിനി തയ്യാറായിട്ടില്ല. കേരളത്തെ ബാധിച്ചുകൊണ്ടിരിക്കുന്ന മാലിന്യ പ്രശ്‌നപരിഹാരത്തിനായി എമര്‍ജിംഗ് കേരളയില്‍ ഒരു പദ്ധതി പോലുമില്ല. വടവാതൂര്‍ മാലിന്യപ്രശ്‌നം നിയമപരമായും രാഷ്‌ട്രീയപരമായും നേരിടുമെന്നും വി.വി. രാജേഷ് കോട്ടയം മണ്ഡലം കമ്മിറ്റി സംഘടിപ്പിച്ച നഗരസഭാ മാര്‍ച്ച് ഉദ്ഘാടനം ചെയ്തുകൊണ്ട് സംസാരിക്കുകയായിരുന്നു അദ്ദേഹം.
മാര്‍ച്ചിന് യുവമോര്‍ച്ച കോട്ടയം മണ്ഡലം പ്രസിഡന്റ് പി.എസ്. ശരത്കുമാര്‍ അദ്ധ്യക്ഷത വഹിച്ചു. യുവമോര്‍ച്ച സംസ്ഥാന ഭാരവാഹികളായ അഡ്വ.ആര്‍.രാജീവ്, എന്‍.ഹരി, ബിജെപി സംസ്ഥാന കൗണ്‍സില്‍ അംഗം ടി.എന്‍.ഹരികുമാര്‍, യുവമോര്‍ച്ച ജില്ലാ പ്രസിഡന്റ് ലിജിന്‍ ലാല്‍ ജനറല്‍ സെക്രട്ടിമാരായ രതീഷ്, അഖില്‍, സി.എന്‍.സുബാഷ് എന്നിവര്‍ സംസാരിച്ചു. ബിജെപി ജില്ലാ ഓഫീസില്‍ നിന്നും ആരംഭിച്ച മാര്‍ച്ചിന് യുവമോര്‍ച്ച മണ്ഡലം നേതാക്കളായ അനീഷ്, ഗോപന്‍, നിഖില്‍, പ്രവീണ്‍, രതീഷ്, ജയകൃഷ്ണന്‍ എന്നിവര്‍ നേതൃത്വം നല്‍കി.
പ്രതികരിക്കാൻ ഇവിടെ എഴുതുക: