പെരുമ്പാവൂര്‍: ഇന്നലെ കേരളത്തിലെമ്പാടും സര്‍ക്കാര്‍ ജീവനക്കാര്‍ പണിമുടക്കി സര്‍ക്കാരിനോട്‌ പ്രതിഷേധച്ചപ്പോള്‍ പെരുമ്പാവൂര്‍ കോടതി മുറ്റത്ത്‌ ആനയും വക്കീലന്മാരും ആഞ്ഞുവലിച്ചത്‌ ശ്രദ്ധേയമായി. പെരുമ്പാവൂര്‍ ബാര്‍ അസോസിയേഷന്റെ ഓണാഘോഷത്തോടനുബന്ധിച്ച്‌ നടന്ന കായിക മത്സരങ്ങളിലെ മുഖ്യ ആകര്‍ഷണമായിരുന്നു ആനയുമായുള്ള വടംവലി. വനിതാ അഭിഭാഷകരും മത്സരത്തില്‍ പങ്കെടുത്തു. ഇന്നലെ രാവിലെ 10 ന്‌ പൂവിടല്‍ മത്സരത്തോടെ ആരംഭിച്ച അഭിഭാഷകരുടെ ഓണാഘോഷത്തില്‍ തിരുവാതിരകളി ഓണസദ്യ വിവിധ ഇനം കായിക മത്സരങ്ങള്‍ എന്നിവ ഉണ്ടായിരുന്നു.
വൈകീട്ട്‌ 6ന്‌ നടന്ന സമാപന സമ്മേളനം ഹൈക്കോടതി ജഡ്ജി ജസ്റ്റീസ്‌ വി.കെ.മോഹനന്‍ ഉദ്ഘാടനം ചെയ്തു. ആരോഗ്യ ഇന്‍ഷുറന്‍സ്‌ പദ്ധതി ഉദ്ഘാടനം എംഎസിടി ജില്ലാ ജഡ്ജി പി.ഡി.സോമന്‍ ഉദ്ഘാടനം ചെയ്തു. ബാര്‍ അസോസിയേഷന്‍ പ്രസിഡന്റ്‌ ബി.രഘുകുമാര്‍ അദ്ധ്യക്ഷത വഹിച്ച യോഗത്തില്‍ ബാര്‍ കൗണ്‍സില്‍ അംഗം കെ.എന്‍.അനില്‍കുമാര്‍, മുന്‍സിഫ്‌ കെ.എസ്‌.മധു, മജിസ്ട്രേട്ട്‌ ജി.രാജേഷ്‌, സബ്ബ്‌ ജഡ്ജ്‌ എം.ബി.സ്നേഹലത, രമേഷ്‌ ചന്ദ്‌, സജീവ്‌ പണിക്കര്‍ തുടങ്ങിയവര്‍ സംസാരിച്ചു.
തുടര്‍ന്ന്‌ സിനിമാതാരം ജയരാജ്‌ വാര്യരുടെ കാരിക്കേച്ചര്‍, അഡ്വ.സ്റ്റാന്‍ലി സെബാസ്റ്റ്യന്‍ അവതരിപ്പിച്ച മാജിക്‌ ഷോ എന്നിവ നടന്നു.
പ്രതികരിക്കാൻ ഇവിടെ എഴുതുക: