കോലഞ്ചേരി: വേതനവര്‍ധന ആവശ്യപ്പെട്ട്‌ തൊഴിലാളികള്‍ അനിശ്ചിതകാല പണിമുടക്ക്‌ തുടരുന്ന കടയിരുപ്പ്‌ പ്ലാന്റ്‌ ലിപ്പിഡ്സ്‌ കമ്പനിയിലേക്ക്‌ ഇന്ന്‌ ബഹുജനമാര്‍ച്ച്‌ നടത്തും. ബിഎംഎസിന്റെ ആഭിമുഖ്യത്തിലാണ്‌ തൊഴിലാളികള്‍ സമരത്തില്‍ ഏര്‍പ്പെട്ടിരിക്കുന്നത്‌.
കമ്പനിപ്പടിക്കല്‍ നടുറോഡില്‍ പൊരിവെയിലത്ത്‌ തൊഴിലാളികളും ജീവനക്കാരും നടത്തുന്ന സമരം ഒത്തുതീര്‍ക്കാന്‍ മാനേജ്മെന്റ്‌ തയ്യാറാകാത്ത സാഹചര്യത്തിലാണ്‌ പൊതുജനത്തിന്റെ പിന്തുണയോടെ മാര്‍ച്ച്‌ സംഘടിപ്പിക്കുന്നതെന്ന്‌ സമരസഹായസമിതി ചെയര്‍മാന്‍ മനോജ്‌ ബി. നായര്‍ അറിയിച്ചു.
28 ദിവസമായി നടന്നുവരുന്ന സമരവുമായി ബന്ധപ്പെട്ട വിഷയങ്ങള്‍ ചര്‍ച്ച ചെയ്യണമെന്നും എത്രയുംവേഗം ഒത്തുതീര്‍പ്പാക്കണമെന്നും സമരസഹായസമിതി ആവശ്യപ്പെട്ടു. ജീവിക്കാനാവശ്യമായ വേതനം ആവശ്യപ്പെട്ടുകൊണ്ട്‌ നടത്തുന്ന സമരം തികച്ചും ന്യായമാണെന്നും ഇത്‌ വിജയിപ്പിക്കേണ്ടത്‌ എല്ലാവരുടെയും ആവശ്യമാണെന്നും സമരസഹായസമിതി വിലയിരുത്തി.
ബഹുജനമാര്‍ച്ചില്‍ ബിഎംഎസ്‌ സംസ്ഥാന ട്രഷറര്‍ വി. രാധാകൃഷ്ണന്‍, ബിജെപി ജില്ലാ പ്രസിഡനൃ അഡ്വ. പി.ജെ. തോമസ്‌, ബിഎംഎസ്‌ ജില്ലാ പ്രസിഡന്റ്‌ എ.ഡി. ഉണ്ണികൃഷ്ണന്‍, ജില്ലാ സെക്രട്ടറി ആര്‍. രഘുരാജ്‌ തുടങ്ങിയവര്‍ പ്രസംഗിക്കും.
പ്രതികരിക്കാൻ ഇവിടെ എഴുതുക: