കൊച്ചി: മുസ്ലീം മതതീവ്രവാദികള്‍ എറണാകുളം ജില്ല താവളമാക്കുന്നു. എന്‍ഡിഎഫ്‌, പോപ്പുലര്‍ ഫ്രണ്ട്‌ തുടങ്ങിയ തീവ്രവാദ ഗ്രൂപ്പുകളാണ്‌ ജില്ലയുടെ വിവിധ ഭാഗങ്ങള്‍ കേന്ദ്രീകരിച്ച്‌ മതവിദ്വേഷപ്രചാരണവും ദേശവിരുദ്ധ പ്രവര്‍ത്തനങ്ങളും ശക്തമാക്കിയിട്ടുള്ളത്‌. മതനിന്ദ ആരോപിച്ച്‌ തൊടുപുഴയില്‍ ന്യൂമാന്‍സ്‌ കോളേജ്‌ അധ്യാപകന്‍ കെ.ജെ. ജോസഫിന്റെ കൈവെട്ടിയതിലൂടെ എറണാകുളം ജില്ല തങ്ങളുടെ തട്ടകമാണെന്ന്‌ പോപ്പുലര്‍ ഫ്രണ്ട്‌ പരസ്യമായി പ്രഖ്യാപിക്കുകയായിരുന്നു. ഇതിന്റെ പേരില്‍ പിടിയിലായ തീവ്രവാദികളെല്ലാം തന്നെ ആലുവ, കാലടി, പെരുമ്പാവൂര്‍ മേഖലകളില്‍നിന്നുള്ളവരായിരുന്നു. കേസില്‍ പോലീസ് അന്വേഷണം ശക്തമാണെന്ന അവകാശവാദത്തിനിടയിലും കാലടി, ആലുവ ഭാഗങ്ങളില്‍ കൈവെട്ട്‌ കേസിന്റെ വാര്‍ഷികാഘോഷം നടത്താന്‍ തീവ്രവാദികള്‍ക്ക്‌ കഴിഞ്ഞു. പോലീസ് ഇതിനുനേരെ കണ്ണടച്ചു എന്ന ആക്ഷേപം ജനങ്ങള്‍ക്കുണ്ട്‌. കൈവെട്ട്‌ കേസിലെ പ്രതിയായ ഒരു കോളേജ്‌ അധ്യാപകന്‍ യുഡിഎഫ്‌ പിന്തുണയോടെ മൂവാറ്റുപുഴ ബ്ലോക്ക്‌ ഡിവിഷനിലേക്ക്‌ മത്സരിച്ച്‌ ജയിച്ചിരുന്നു. മതവിദ്വേഷം കുത്തിപ്പൊക്കുന്ന വിധത്തിലും ദേശദ്രോഹത്തിന്‌ വളംവെക്കുന്ന വിധത്തിലും ഇക്കൂട്ടര്‍ നടത്തുന്ന പ്രചാരണങ്ങള്‍ക്കെതിരെ അധികൃതരുടെ ഭാഗത്തുനിന്ന്‌ മതിയായ നടപടികളുണ്ടാകുന്നില്ല.
ഇപ്പോള്‍ എന്‍ഐഎ അന്വേഷിക്കുന്ന പാനായിക്കുളം ‘സിമി’ ഗൂഢാലോചനക്കേസിന്‌ ആസ്പദമായ സംഭവം നടന്നത്‌ ആലുവക്കടുത്താണ്‌. പോലീസിനെ വെല്ലുവിളിച്ചും നിരോധനാജ്ഞക്ക്‌ പുല്ലുവില കല്‍പ്പിച്ചും പെരുമ്പാവൂരില്‍ തീവ്രവാദി ഗ്രൂപ്പുകള്‍ ഫ്രീഡം പരേഡ്‌ നടത്തുകയുണ്ടായി. എന്നാല്‍ ഇക്കൂട്ടരുടെ അഴിഞ്ഞാട്ടത്തില്‍ കയ്യുംകെട്ടി നില്‍ക്കുകയാണ്‌ അധികൃതര്‍ ചെയ്തത്‌. രണ്ട്‌ മാസം മുമ്പ്‌ പെരുമ്പാവൂര്‍ ശ്രീധര്‍മശാസ്താ ക്ഷേത്രത്തിന്‌ മുന്നിലിട്ട്‌ ഒരു പശുവിനെ അറുത്ത്‌ കലാപത്തിന്‌ ശ്രമിക്കുകയുണ്ടായി. കാസര്‍കോട്ടും ഇതിന്‌ സമാനമായ സംഭവങ്ങള്‍ അരങ്ങേറി. അവിടെ മീപ്പുരി ദുര്‍ഗാപരമേശ്വരി ക്ഷേത്രത്തിലെ ദീപസ്തംഭത്തില്‍ പോത്തിന്റെ തല കൊണ്ടുവെക്കുകയായിരുന്നു. ഇതിനുത്തരവാദികളായ തീവ്രവാദികള്‍ പെരുമ്പാവൂരിലായിരുന്നു ഒളിവില്‍ കഴിഞ്ഞിരുന്നത്‌. പെരുമ്പാവൂരിലെ ഒരു ബേക്കറിയില്‍നിന്നാണ്‌ ഇവരെ അടുത്തിടെ അറസ്റ്റ്‌ ചെയ്തത്‌. സംസ്ഥാനത്തെ തീവ്രവാദപ്രസ്ഥാനങ്ങളുടെ ഹബ്ബായി എറണാകുളം ജില്ല മാറുകയാണെന്നാണ്‌ ഇതെല്ലാം കാണിക്കുന്നത്‌.
ആലുവയില്‍ ആറ്‌, ഏഴ്‌, എട്ട്‌ തീയതികളില്‍ നടക്കുന്ന ഹിന്ദു ഐക്യവേദിയുടെ സംസ്ഥാന സമ്മേളനത്തിനെതിരെ പോസ്റ്ററുകളുമായി മതതീവ്രവാദ സംഘടനകള്‍ രംഗത്തെത്തിയിരിക്കുന്നത്‌ വര്‍ഗീയകലാപത്തിനുള്ള നീക്കമാണെന്ന ആശങ്ക ജനങ്ങളില്‍ ഉയര്‍ന്നിരിക്കുകയാണ്‌. ഹിന്ദു ഐക്യവേദി സമ്മേളനത്തില്‍ ആര്‍എസ്‌എസ്‌ അഖിലേന്ത്യാ നേതാവ് ഇന്ദ്രേഷ്കുമാര്‍ വരുന്നതിനെതിരെയാണ്‌ മതതീവ്രവാദികള്‍ കുപ്രചാരണം നടത്തുന്നത്‌. വര്‍ഗീയകലാപം ഉണ്ടാക്കാനായി നടത്തിയ പെരുമ്പാവൂര്‍ , കാസര്‍കോട്‌ സംഭവങ്ങള്‍ ഹിന്ദുക്കളുടെ സംയമനം മൂലം വലിയ പ്രശ്നങ്ങളില്ലാതെ കഴിഞ്ഞുപോയ സാഹചര്യത്തിലാണ്‌ ഇപ്പോള്‍ തീവ്രവാദികള്‍ ആലുവ കേന്ദ്രീകരിച്ച്‌ കലാപത്തിന്‌ നീക്കം നടത്തുന്നതെന്ന്‌ വിലയിരുത്തപ്പെടുന്നു. മതതീവ്രവാദികളുടെ ആസൂത്രിത നീക്കങ്ങളെക്കുറിച്ച്‌ രഹസ്യാന്വേഷണ ഏജന്‍സികള്‍ വിവരങ്ങള്‍ നല്‍കുന്നുണ്ടെങ്കിലും മുസ്ലീം വോട്ടുബാങ്കില്‍ കണ്ണുവെച്ച്‌ ഇതിനെതിരെ നടപടികളെടുക്കാതെ അധികൃതര്‍ അനങ്ങാപ്പാറനയം സ്വീകരിക്കുകയാണെന്ന ആക്ഷേപം ശക്തമാണ്‌.
പ്രതികരിക്കാൻ ഇവിടെ എഴുതുക: