മരട്‌: നെട്ടൂരില്‍ വീട്ടില്‍കയറി സ്ത്രീയേയും മകനേയും ആക്രമിച്ച കേസിലെ പ്രതിയെ പോലീസ്‌ പിടികൂടി. നിരവധി കേസുകളില്‍ പ്രതിയായി ശിക്ഷിക്കപ്പെട്ടിട്ടുള്ള നെട്ടൂര്‍ പെരിങ്ങാട്ടുപറമ്പില്‍ അബ്ദുള്‍ കരീം മകന്‍ നസീറി (പുലി നസീര്‍-35)നെയാണ്‌ സംഭവവുമായി ബന്ധപ്പെട്ട്‌ ഇന്നലെ പനങ്ങാട്‌ പോലീസ്‌ അറസ്റ്റ് ചെയ്തത്‌. നെട്ടൂരിലെതന്നെ പള്ളിപ്പറമ്പില്‍ കരിക്കാശ്ശേരി സിബിയുടെ ഭാര്യ ഷീജയേയും മകനേയും ഇയാള്‍ കഴിഞ്ഞദിവസം വീട്ടില്‍ കയറി ഭീഷണിപ്പെടുത്തുകയും ക്രൂരമായി മര്‍ദ്ദിക്കുകയും ചെയ്തതെന്നാണ്‌ പരാതി.
മര്‍ദ്ദനത്തിന്‌ ഇരയായ സ്ത്രീയുടെ പരാതിയെത്തുടര്‍ന്നാണ്‌ പ്രതി നസീറിനെ പനങ്ങാട്‌ പോലീസ്‌ അറസ്റ്റ് ചെയ്തത്‌. വിവിധ പോലീസ്‌ സ്റ്റേഷനുകളിലായി മുപ്പതോളം കേസുകളില്‍ പ്രതിചേര്‍ക്കപ്പെട്ടിട്ടുള്ള ആളാണെന്നും ശിക്ഷ കഴിഞ്ഞ്‌ അടുത്തിടെയാണ്‌ ഇയാള്‍ പുറത്തിറങ്ങിയതെന്നും പോലീസ്‌ അറിയിച്ചു.
ഷീജയുടെ സഹോദരന്‍ ജൂഡിനെ അന്വേഷിച്ച്‌ ഇയാള്‍ വീട്ടിലെത്തുക പതിവായിരുന്നു. എന്നാല്‍ ക്രിമിനലായ നസീറിനൊപ്പം പോകരുതെന്ന്‌ സഹോദരനെ വിലക്കിയതാണ്‌ ആക്രമണത്തിന്‌ പ്രകോപനമായതെന്ന്‌ പോലീസ്‌ പറഞ്ഞു. പനങ്ങാട്‌ എസ്‌ഐ എ.ബി.വിപിന്‍, പോലീസുകാരായ മോഹനന്‍, ഗിരീഷ്‌, ഷിബു എന്നിവര്‍ ചേര്‍ന്നാണ്‌ പ്രതിയെ അറസ്റ്റ് ചെയ്തത്‌. ഇയാളെ വൈകിട്ട്‌ മജിസ്ട്രേറ്റിന്‌ മുമ്പില്‍ ഹാജരാക്കി.
പ്രതികരിക്കാൻ ഇവിടെ എഴുതുക: