ലെനിന് നിവാസില്‍ സഖാവ്‌ ലെനിന് ബ്രാഞ്ച്‌ കമ്മറ്റിയിലിരുന്ന്‌ ‘ജനകീയ ജനാധിപത്യ വിപ്ലവം’ സ്വപ്നം കാണുന്ന സാധാരണ സഖാവാണ്‌. സ്വന്തം പാര്‍ട്ടി നേതാക്കളുടെ പ്രസ്താവനകള്‍ സ.ലെനിന് വേദവാക്യവും.
തെങ്ങുകയറ്റം തൊഴിലാക്കിയ സ. ലെനിന് കിട്ടുന്ന വരുമാനത്തിന്റെ ചെറിയൊരു പങ്ക്‌ ജനകീയ ജനാധിപത്യ വിപ്ലവം പുലര്‍ന്ന്‌ കാണാന്‍ പാര്‍ട്ടിക്ക്‌ വര്‍ഷാവര്‍ഷം മെമ്പര്‍ഷിപ്പ്‌ കാശായും മാസാമാസമുള്ള ലെവിയായും ഇടക്കിടെയുള്ള ബക്കറ്റ്‌ പരിപാടിയും ഫണ്ട്‌ ശേഖരമായും നല്‍കി വരുന്നുണ്ട്‌.
പാര്‍ട്ടി കമ്മറ്റികളില്‍ ഉറക്കമിളച്ചിരുന്ന്‌ നേതാക്കള്‍ സാര്‍വ്വദേശീയവും ദേശീയവും പ്രാദേശികവുമായ കാര്യങ്ങള്‍ പറയുന്നത്‌ കേള്‍ക്കുമ്പോള്‍ പലതവണ സ്വപ്നങ്ങളുടെ കൊടുമുടിയേറി നീലാകാശം തൊട്ടുരുമ്മി അയാള്‍ നടന്നിട്ടുണ്ട്‌. വിപ്ലവം വന്നാല്‍ ഉള്ളവനും ഇല്ലാത്തവനുമെന്ന വേര്‍തിരിവുണ്ടാവില്ല. ഒരുവന്റെ വാക്കുകള്‍ അന്യന്‌ അനുഭവപ്പെടുന്നത്‌ ഗാനഗന്ധര്‍വന്റെ പാട്ട്‌ പോലെയായിരിക്കും. ചൂഷണമെന്നത്‌ അപ്രത്യക്ഷമായിത്തീര്‍ന്നിരിക്കും!….
സ.ലെനിന് സ്വപ്നങ്ങളെ താലോലിച്ച്‌ ജീവിതം മുന്നോട്ട്‌ ഉന്തിനീക്കുന്നതിനിടയിലാണ്‌ പാര്‍ട്ടിയില്‍ വിഭാഗീയത ഉണ്ടെന്ന നട്ടാല്‍ മുളക്കാത്ത നുണകളുമായി ബൂര്‍ഷ്വാ പെറ്റിബൂര്‍ഷ്വാ മാധ്യമങ്ങള്‍ രംഗത്തെത്തുന്നത്‌. പക്ഷെ, ഇതത്രയും വിശ്വസിക്കാന്‍ സെ.ലെനിന്റെ ജനകീയ ജനാധിപത്യ വിപ്ലവബോധം തരംതാണതായിരുന്നില്ല. വിപ്ലവത്തെ തകര്‍ക്കാന്‍ ഇങ്ങനെ പലതുമുണ്ടാകും. ഊണിലും ഉറക്കിലും വിപ്ലവമെന്ന്‌ മാത്രം ഉരുവിടുന്ന പാര്‍ട്ടി നേതാക്കള്‍ ഇത്‌ തന്നെയാണ്‌ പറഞ്ഞത്‌. സാമ്രാജ്യത്വത്തിന്റെ ചെയ്തികളാണ്‌ ഗൂഢാലോചനക്ക്‌ പിറകിലെന്ന്‌ പാര്‍ട്ടി പത്രം ദിനംപ്രതി വെണ്ടക്ക നിരത്തിയപ്പോള്‍ സ.ലെനിന്റെ കണ്ണുകള്‍ സന്തോഷാശ്രുക്കളാല്‍ ഈറനണിയുക പതിവാണ്‌.
വിപ്ലവം പൂര്‍ത്തീകരിക്കണമെങ്കില്‍ ഇത്തരത്തിലുള്ള എത്രയോ കടമ്പകള്‍ കടക്കേണ്ടതായുണ്ട്‌. കടന്നാല്‍ത്തന്നെ അത്‌ നിലനിര്‍ത്താന്‍ അതിലുമേറെയാണ്‌ പാട്‌. സോവിയറ്റ്‌ യൂണിയനടക്കം എത്രയോ രാജ്യങ്ങള്‍ ഉപ്പ്‌വെച്ച കലം പോലെ പൊട്ടിതകര്‍ന്നതിനെക്കുറിച്ച്‌ ഓര്‍ക്കുമ്പോള്‍ സ.ലെനിന് ഇപ്പോഴും ഞെട്ടലാണ്‌.
സാമ്രാജ്യത്വം കോലം പലതും കെട്ടി വരും. ശ്രദ്ധിക്കണം…. നേതാക്കള്‍ ബ്രാഞ്ച്‌ കമ്മറ്റിയിലും അല്ലാതെയും വന്ന്‌ പലതവണ ആവര്‍ത്തിച്ചതാണെങ്കിലും മുനിസിപ്പാലിറ്റി വണ്ടിയിലേതുപോലെ പാര്‍ട്ടിയില്‍ ചിലതൊക്കെ ചീഞ്ഞുനാറുന്നുണ്ടെന്ന്‌ സ.ലെനിന്റെ ബോധമനസ്സ്‌ പിറുപിറുക്കാന്‍ തുടങ്ങിയിരുന്നു. അയാള്‍ സത്യസന്ധരായ ചില പാര്‍ട്ടിക്കാരെ കഷ്ടപ്പെട്ട്‌ കണ്ടെത്തി അറിഞ്ഞ കാര്യങ്ങള്‍ ബൂര്‍ഷ്വാ പെറ്റിബൂര്‍ഷ്വാ പത്രങ്ങളില്‍ വന്നതു തന്നെയായിരുന്നു. എങ്കിലും ഇതൊക്കെ സാധാരണമാണെന്ന്‌ ഉള്‍പ്പാര്‍ട്ടി ജനാധിപത്യം വെച്ച്‌ നോക്കിയപ്പോള്‍ സ.ലെനിന് മനസ്സിലായി. പാര്‍ലമെന്ററി വ്യാമോഹമാണ്‌ വില്ലന്‍!
ഇതിനിടയിലാണ്‌ ഇടിത്തീ വീണതുപോലെ തലമൂത്ത സഖാവിന്റെ പ്രസ്താവന വന്നത്‌. ‘പാര്‍ട്ടിയില്‍ വിഭാഗീയത പൂര്‍ണ്ണമായും അവസാനിച്ചിരിക്കുകയാണ്‌.
ഇത്രയും കാലം നടന്നത്‌ പാര്‍ട്ടിക്ക്‌ യോജിക്കും വിധമുള്ള ആരോഗ്യകരമായ പ്രവര്‍ത്തനങ്ങളാണ്‌. ജനാധിപത്യം അതിരു കടക്കുമ്പോള്‍ അത്‌ വിഭാഗീയതയായി തെറ്റിദ്ധരിക്കപ്പെട്ടേക്കാം…..’ ഇക്കാര്യം വായിച്ച സ.ലെനിന് തന്റെ അല്‍പ്പം നീണ്ടുവളഞ്ഞ മൂക്കില്‍ ചൂണ്ടുവിരല്‍ അറിയാതെ വെച്ചുപോയി. ഇതിനാണോ സാമ്രാജ്യത്വവും ബൂര്‍ഷ്വാ-പെറ്റിബൂര്‍ഷ്വാ മാധ്യമങ്ങളും വിഭാഗീയതയെന്ന്‌ പറയുന്നത്‌ ??! തികട്ടി വന്ന ഉമിനീര്‌ സ. ലെനിന് അപ്പാടെ ഉള്ളിലേക്ക്‌ തന്നെ ഇറക്കി.
പി.പി.ദിനേശ്‌
പ്രതികരിക്കാൻ ഇവിടെ എഴുതുക: