ചാലക്കുടി : എട്ടാമത്‌ ഭാരതീയ വിദ്യാനികേതന്‍ സംസ്ഥാന കലോത്സവത്തിന്‌ ഒരുക്കങ്ങള്‍ പൂര്‍ത്തിയായതായി സ്വാഗതസംഘം ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. ചാലക്കുടി വ്യാസ വിദ്യാനികേതന്‍ സീനിയര്‍ സെക്കണ്ടറി സ്കൂളില്‍ 13,14,15 തീയതികളിലാണ്‌ കലോത്സവത്തിന്‌ വേദിയൊരുങ്ങുന്നത്‌. 13ന്‌ രാവിലെ 11.30ന്‌ സിനിമാതാരങ്ങളായ പത്മശ്രീ സുകുമാരി, കലാഭവന്‍ മണി എന്നിവര്‍ ചേര്‍ന്ന്‌ കലോത്സവം ഉദ്ഘാടനം ചെയ്യും. വിദ്യാനികേതന്‍ സംസ്ഥാന പ്രസിഡണ്ട്‌ ഡോ.ആര്‍.രവീന്ദ്രന്‍ പിള്ള അദ്ധ്യക്ഷത വഹിക്കും. എംഎല്‍എ ബി.ഡി. ദേവസ്സി പൊതുസമ്മേളനം ഉദ്ഘാടനം ചെയ്യും. ആര്‍എസ്‌എസ്‌ സംസ്ഥാന സേവാപ്രമുഖ്‌ ജി.പത്മനാഭന്‍ ദീപം തെളിയിക്കും. വിദ്യാഭാരതി അഖിലേന്ത്യാ സഹസംഘടന കാര്യദര്‍ശി ജെ.എം.കാശിപതി മുഖ്യാതിഥിയായി പങ്കെടുക്കുന്നതോടൊപ്പം സ്കൂളില്‍ പുതിയതായി നിര്‍മ്മിച്ച കെ.ജി.വിഭാഗം കെട്ടിടം ഉദ്ഘാടനം ചെയ്യും. ഉദ്ഘാടനത്തിന്‌ മുന്നോടിയായി രാവിലെ 9.30ന്‌ സാംസ്കാരിക ഘോഷയാത്ര കണ്ണമ്പുഴ ക്ഷേത്രപരിസരത്തുനിന്നാരംഭിക്കും. എസ്‌ഐ പി.ലാല്‍കുമാര്‍ ഘോഷയാത്ര ഫ്ലാഗ്‌ ഓഫ്‌ ചെയ്യും. നിശ്ചലദൃശ്യങ്ങള്‍, കാവടി, പഞ്ചവാദ്യം, പാണ്ടിമേളം, നാടന്‍ കലാരൂപങ്ങള്‍ എന്നിവ ഘോഷയാത്രയെ വര്‍ണശബളമാക്കും. സ്വാഗതസംഘം ചെയര്‍മാന്‍ ഡോ.പി.ഗൗരിശങ്കര്‍ സമ്മാനദാനം നിര്‍വ്വഹിക്കും.
കലോത്സവത്തില്‍ 171 ഇനങ്ങളില്‍ 2300ലേറെ വിദ്യാര്‍ത്ഥികള്‍ മാറ്റുരക്കും. പത്ത്‌ വേദികളിലായി എല്‍പി, യുപി , ഹൈസ്കൂള്‍, ഹയര്‍ സെക്കണ്ടറി വിഭാഗങ്ങളില്‍ മത്സരങ്ങള്‍ നടക്കും. 14 ജില്ലകളില്‍ നിന്നായി എത്തുന്ന വിദ്യാര്‍ത്ഥികള്‍ക്ക്‌ ചാലക്കുടി, കൊടകര, നന്തിക്കര, കോടാലി എന്നിവിടങ്ങളിലാണ്‌ താമസസൗകര്യങ്ങള്‍ ഒരുക്കിയിരിക്കുന്നത്‌. എല്ലാദിവസവും രാത്രി 8മണിയോടെ മത്സരങ്ങള്‍ പൂര്‍ത്തിയാക്കും.
പതിനഞ്ച്‌ വൈകീട്ട്‌ 4ന്‌ നടക്കുന്ന സമാപനസമ്മേളനത്തില്‍ ഹോളിമാത ഗ്രൂപ്പ്‌ ഓഫ്‌ കോളേജ്‌ ചെയര്‍മാന്‍ ഡോ.പി.ആര്‍.രാധാകൃഷ്ണന്‍ സമ്മാനദാനം നിര്‍വ്വഹിക്കും. വിദ്യാഭാരതി ക്ഷേത്രീയ അദ്ധ്യക്ഷന്‍ ഡോ.പി.കെ.മാധവന്‍ അധ്യക്ഷത വഹിക്കും. സംസ്ഥാന സംഘടന സെക്രട്ടറി എ.സി.ഗോപിനാഥ്‌ ദീപം തെളിയിക്കും. കലോത്സവത്തിന്റെ വിജയത്തിനായി 108 ഗ്രാമങ്ങളില്‍ ഗ്രാമയോഗങ്ങള്‍ പൂര്‍ത്തിയായി 12ന്‌ ഉച്ചക്ക്‌ 12മണിക്ക്‌ കലവറനിറയ്‌ക്കല്‍ ചടങ്ങ്‌ നടക്കും. കലവറയിലേക്കുള്ള ദ്രവ്യങ്ങള്‍ പോട്ട ഗ്രാമത്തിലെ ഏറ്റവും പ്രായമേറിയ നാല്‌ മുത്തശ്ശിമാര്‍ ചേര്‍ന്ന്‌ ഏറ്റുവാങ്ങും. വാര്‍ത്താസമ്മേളനത്തില്‍ മീഡിയ കമ്മിറ്റി ചെയര്‍മാന്‍ ആര്‍.ബാലകൃഷ്ണന്‍, ഭാരതീയ വിദ്യാനികേതന്‍ ജില്ല. ജോയിന്റ്‌ സെക്രട്ടറി എം.ആര്‍.ബിജോയ്‌, സ്വാഗതസ്വംഘം, വര്‍ക്കിങ്ങ്‌ ചെയര്‍മാന്‍, എന്‍.കുമാരന്‍, ജനറല്‍ കണ്‍വീനര്‍ കെ.പി.ഹരിദാസ്‌, ജഗദ്ഗുരി ട്രസ്റ്റ്‌ ചെയര്‍മാന്‍, പി.കെ.സുബ്രഹ്മണ്യന്‍ എന്നിവര്‍ പങ്കെടുത്തു.
പ്രതികരിക്കാൻ ഇവിടെ എഴുതുക: