ഓപ്പറേഷൻ സിന്ദൂരിന് ശേഷം പ്രധാനമന്ത്രി മോദി ഗുജറാത്തിലെത്തി : വഡോദരയിൽ റോഡ് ഷോ നടത്തി

സൂററ്റ് : ഓപ്പറേഷൻ സിന്ദൂർ വിജയകരമായി പൂർത്തിയാക്കിയ ശേഷം പ്രധാനമന്ത്രി നരേന്ദ്ര മോദി രണ്ട് ദിവസത്തെ സന്ദർശനത്തിനായി ആദ്യമായി സ്വന്തം സംസ്ഥാനമായ ഗുജറാത്തിൽ എത്തി. വഡോദരയിൽ നിന്നാണ് പ്രധാനമന്ത്രി മോദി ഗുജറാത്ത് പര്യടനം ആരംഭിച്ചത്. ഇവിടെ അദ്ദേഹം ഒരു റോഡ് ഷോ നടത്തി ജനങ്ങളുടെ ആശംസകൾ സ്വീകരിച്ചു.

പ്രധാനമന്ത്രി നരേന്ദ്ര മോദി വിമാനത്താവളത്തിൽ നിന്ന് വ്യോമസേനാ ഗേറ്റ് വരെ ഒരു കിലോമീറ്റർ നീളമുള്ള റോഡ് ഷോയാണ് നടത്തിയത്. ‘സിന്ദൂർ സമ്മാൻ യാത്ര’ എന്നാണ് റോഡ് ഷോയ്‌ക്ക് പേരിട്ടിരിക്കുന്നത്.

ഇതിനു പുറമെ പ്രധാനമന്ത്രി മോദി ഇന്ന് ഗുജറാത്തിൽ മൂന്ന് റോഡ് ഷോകളിലും മൂന്ന് പരിപാടികളിലും പങ്കെടുക്കും. വഡോദരയ്‌ക്ക് ശേഷം പ്രധാനമന്ത്രി മോദി ദാഹോദിൽ ഒരു പൊതുയോഗത്തെ അഭിസംബോധന ചെയ്യും. ഈ സമയത്ത് നിരവധി റെയിൽവേ പദ്ധതികൾ ഉദ്ഘാടനം ചെയ്യപ്പെടും. ഉച്ചകഴിഞ്ഞ് പ്രധാനമന്ത്രി ഭുജിലും അഹമ്മദാബാദിലും റോഡ് ഷോകൾ നടത്തും. തുടർന്ന് തിങ്കളാഴ്ച രാത്രി അദ്ദേഹം രാജ്ഭവനിൽ തങ്ങും.

അടുത്ത ദിവസം മെയ് 27 ന് ഗാന്ധിനഗറിൽ മഹാത്മാ മന്ദിർ നഗരവികസന മന്ത്രാലയത്തിന്റെ പരിപാടിയിൽ മോദി പങ്കെടുക്കും. ഇതിനുശേഷം അഹമ്മദാബാദിൽ നിന്ന് ദൽഹിയിലേക്ക് പോകും.

ഈ ആഴ്ചയിലെ ആറ് ദിവസത്തിനുള്ളിൽ പ്രധാനമന്ത്രി നരേന്ദ്ര മോദി ആറ് സംസ്ഥാനങ്ങൾ സന്ദർശിക്കും. ഈ കാലയളവിൽ അദ്ദേഹം ഗുജറാത്ത്, സിക്കിം, പശ്ചിമ ബംഗാൾ, ഉത്തർപ്രദേശ്, ബീഹാർ, മധ്യപ്രദേശ് എന്നിവിടങ്ങൾ സന്ദർശിക്കും.