കൊച്ചി: ഭര്‍തൃവീട്ടില്‍ വച്ച് ഉണ്ടാകുന്ന ബോഡി ഷേമിങ്ങും ഗാര്‍ഹിക പീഡനത്തിന്റെ പരിധിയില്‍ വരുമെന്ന് ഹൈക്കോടതി. ഗാര്‍ഹിക പീഡനക്കേസില്‍ പൊലീസ് റിപ്പോര്‍ട്ട് റദ്ദാക്കണമെന്ന് ആവശ്യപ്പെട്ട് ഭര്‍തൃസഹോദരന്റെ ഭാര്യ നല്‍കിയ ഹര്‍ജി ഹൈക്കോടതി റദ്ദാക്കുകയും ചെയ്തു. ഭര്‍ത്താവും ഭര്‍തൃ പിതാവും ഒന്നും രണ്ടും പ്രതികളായ കേസില്‍ മൂന്നാം പ്രതിയായ ഭര്‍തൃസഹോദരന്റെ ഭാര്യ ബോഡി ഷേപ്പ് ഇല്ലെന്ന് അധിക്ഷേപിച്ചു എന്നായിരുന്നു യുവതിയുടെ പരാതി. തന്റെ എംബിബിഎസ് യോഗ്യതയെ സംശയിച്ചുവെന്നും പരാതിക്കാരി കോടതിയില്‍ ബോധിപ്പിച്ചു. അധിക്ഷേപം അതിരു കടന്നതോടെ യുവതി ഭര്‍തൃവീട്ടില്‍ നിന്ന് മടങ്ങിപ്പോവുകയും ചെയ്തു.തുടര്‍ന്നാണ് കൂത്തുപറമ്പ് പോലീസില്‍ പരാതി നല്‍കിയത്. കേസ് റദ്ദാക്കണമെന്ന് ആവശ്യപ്പെട്ടാണ് മൂന്നാം പ്രതി ഹൈക്കോടതിയെ സമീപിച്ചത്. ഭര്‍തൃവീട്ടില്‍ ഒപ്പം താമസിക്കുന്ന അടുത്ത ബന്ധുക്കള്‍ ഇന്ത്യന്‍ ശിക്ഷാനിയമം 498 എ പ്രകാരം ബന്ധു എന്നാല്‍ നിര്‍വചനത്തില്‍ പെടുമെന്നും അതിനാല്‍ ഗാര്‍ഹിക പീഡന നിയമത്തില്‍ നിന്ന് മൂന്നാം പ്രതിയെ ഒഴിവാക്കാനാകില്ലെന്നും ജസ്റ്റിസ് എ ബദറുദ്ദീന്‍ വ്യക്തമാക്കി.
പ്രതികരിക്കാൻ ഇവിടെ എഴുതുക: