അഹമ്മദാബാദ്: ന്യൂസിലന്‍ഡിനെതിരായ വനിതാ ഏകദിന പരമ്പര ഇന്ത്യക്ക്. മൂന്ന് മത്സരങ്ങളുടെ ഏകദിന പരമ്പര 2-1നാണ് ഇന്ത്യന്‍ വനിതകള്‍ സ്വന്തമാക്കിയത്.
ചൊവ്വാഴ്ച അഹമ്മദാബാദ് നരേന്ദ്ര മോദി സ്‌റ്റേഡിയത്തില്‍ നടന്ന നിര്‍ണായക മത്സരത്തില്‍ ആറ് വിക്കറ്റിനാണ് ഇന്ത്യന്‍ വിജയം.
ടോസ് നേടി ആദ്യം ബാറ്റ് ചെയ്ത ന്യൂസിലന്‍ഡ് 49.5 ഓവറില്‍ 232 റണ്‍സിന് എല്ലാവരും പുറത്തായി. 44.2 ഓവറില്‍ നാല് വിക്കറ്റ് നഷ്ടത്തില്‍ ഇന്ത്യ ലക്ഷ്യം കണ്ടു. സ്മൃതി മന്ദാനയാണ്(100) ഇന്ത്യയുടെ ടോപ് സ്‌കോറര്‍.
ക്യാപ്റ്റന്‍ ഹര്‍മന്‍പ്രീത് കൗര്‍ (59 നോട്ടൗട്ട്) മികച്ച ബാറ്റിംഗ് കാഴ്ച വച്ചു.
ന്യൂസിലന്‍ഡിനായി ബ്രൂക്ക് ഹാളിഡേ (86) ജോര്‍ജിയ പ്ലിമ്മര്‍(39), ഇസബെല്ല ഗേസ്(25), ലിയാ താഹുഹു(24) എന്നിവര്‍ നന്നായി ബാറ്റ് വീശി. ഇന്ത്യക്ക് വേണ്ടി ദീപ്തി ശര്‍മ 39 റണ്‍സിന് മൂന്ന് വിക്കറ്റെടുത്തപ്പോള്‍ പ്രിയ മിശ്ര രണ്ട് വിക്കറ്റ് വീഴ്ത്തി.
ഇന്ത്യക്ക് തുടക്കത്തിലെ ഷഫാലി വര്‍മയെ(12) നഷ്ടമായിരുന്നു. 122 പന്തില്‍ 100 റണ്‍സെടുത്ത സ്മൃതി മന്ദാന സെഞ്ച്വറിക്ക് പിന്നാലെ മടങ്ങി. 18 പന്തില്‍ 22 റണ്‍സെടുത്ത ജെമീമയെ വിജയത്തിന് ഒരു റണ്ണകലെ പുറത്തായി
സോഫി ഡിവൈനിനെ ബൗണ്ടറി കടത്തിയാണ് ഹര്‍മന്‍പ്രീത് ഇന്ത്യയെ വിജയത്തിലെത്തിച്ചത്. കിവീസിനായി ഹന്ന റോവ് രണ്ടും സോഫി ഡിവൈനും ഫ്രാന്‍ ജോനാസും ഓരോ വിക്കറ്റും നേടി. ദീപ്തി ശര്‍മ്മയെ പരമ്പരയിലെ താരമായി തെരഞ്ഞെടുത്തു. സ്മൃതി മന്ദാനയാണ് കളിയിലെ താരം.
പ്രതികരിക്കാൻ ഇവിടെ എഴുതുക: