തിരുവനന്തപുരം: നാഗര്‍കോവിലില്‍ ആത്മഹത്യ ചെയ്ത കൊല്ലം പിറവന്തൂര്‍ സ്വദേശിനി അധ്യാപികയുടെ ഭര്‍തൃമാതാവ് മരിച്ചു. ശ്രുതിയുടെ ആത്മഹത്യക്ക് പിന്നാലെ ജീവനൊടുക്കാന്‍ ശ്രമിച്ച ഭര്‍തൃമാതാവ് ചെമ്പകവല്ലി ആശുപത്രിയില്‍ ചികിത്സയിലിരിക്കെയാണ് തിങ്കളാഴ്ച മരിച്ചത്.
ചെമ്പകവല്ലിയുടെ പീഡനം കാരണം ജീവനൊടുക്കുകയാണെന്നാണ് ശ്രുതിയുടെ അവസാന സന്ദേശത്തില്‍ പറഞ്ഞത്.തമിഴ്‌നാട് വൈദ്യുതി വകുപ്പില്‍ എഞ്ചിനിയര്‍ ആയ പിറവന്തൂര്‍ സ്വദേശി ബാബുവിന്റെ മകളാണ് സ്വകാര്യ കോളേജില്‍ അസിസ്റ്റന്റ് പ്രൊഫസറായിരുന്ന ശ്രുതി.
നാഗര്‍കോവില്‍ സ്വദേശി വൈദ്യുതി വകുപ്പ് ജീവനക്കാരനായ കാര്‍ത്തികുമായി കഴിഞ്ഞ ഏപ്രില്‍ മാസത്തിലാണ് വിവാഹം കഴിഞ്ഞത്. പത്ത് ലക്ഷം രൂപയും 50 പവനും നല്‍കിയാണ് വിവാഹം നടത്തിയത്.. സ്തീധനം കുറഞ്ഞുപോയെന്ന് കുറ്റപ്പെടുത്തി ചെമ്പകവല്ലി ശ്രുതിയെ നിരന്തരം ഉപദ്രവിച്ചിരുന്നു. ശ്രുതി് വീട്ടിലേക്ക് തിരിച്ചു പോകണമെന്ന് ചെമ്പകവല്ലി നിര്‍ബന്ധിച്ചതോടെയാണ് കഴിഞ്ഞ ദിവസം അമ്മയ്‌ക്ക് ഫോണില്‍ ശബ്ദസന്ദേശം അയച്ച് ശ്രുതി ജീവനൊടുക്കിയത്. അമ്മയുടെ കുത്തുവാക്കുകള്‍ക്ക് മുന്നില്‍ കാര്‍ത്തിക് ഒന്നും മിണ്ടിയിരുന്നില്ലെന്നാണ് ശ്രുതി സ്വന്തം അമ്മയോട് പറഞ്ഞത്.
ഭര്‍തൃവീട്ടിലെ പീഡനം ശ്രുതി പലപ്പോഴും പറഞ്ഞിരുന്നെങ്കിലും ഭര്‍ത്താവുമായി ഒത്തുപോകാനാണ് വീട്ടുകാര്‍ നിര്‍ദ്ദേശിച്ചത്.ശ്രുതിയുടെ മരണത്തിന് തൊട്ടുപിന്നാലെ സംഭവം മാധ്യമങ്ങളില്‍ വന്നതോടെയാണ് ചെമ്പകവല്ലി ആത്മഹത്യക്ക് ശ്രമിച്ചത്.
പ്രതികരിക്കാൻ ഇവിടെ എഴുതുക: