പെരുമ്പാവൂർ : ഒളിവിലായിരുന്ന ഇരുപതോളം ക്രിമിനൽ കേസുകളിലെ പ്രതിയെ പോലീസ് സാഹസികമായി പിടികൂടി. കുറുപ്പംപടി വേങ്ങൂർ കൊച്ചുപുരക്കൽ കടവ് മാന്നാം കുഴിയിൽ ലാലു (28)നെയാണ് കുട്ടംപുഴ പോലീസ് പിടികൂടിയത്.
കുറുപ്പംപടി പോലീസ് ഇയാൾക്കെതിരെ കാപ്പ ചുമത്താനുള്ള നടപടിയ്‌ക്കായി ജില്ലാ പോലീസ് ആസ്ഥാനത്തേക്ക് ശുപാർശ നൽകിയിരുന്നു. ജില്ലാ പോലീസ് മേധാവി വൈഭവ് സക്സേനയുടെ റിപ്പോർട്ടിന്റെ അടിസ്ഥാനത്തിൽ ജില്ലാ കളക്ടർ എൻ. എസ് .കെ ഉമേഷ് കാപ്പ പ്രകാരം തടങ്കലിൽ പാർപ്പിയ്‌ക്കാൻ ഉത്തരവിട്ടു.
ഈ സമയം ഇയാൾ ഒളിവിലായിരുന്നു. ഒളിവിൽ കഴിയുമ്പോൾ കുട്ടൻപുഴ സ്റ്റേഷൻ പരിധിയിലെ വടാട്ടുപാറ ഭാഗത്ത് വച്ച് യുവാവിനെ ആക്രമിച്ച് പരിക്കേൽപ്പിക്കുകയുണ്ടായി. തുടർന്ന് ഇയാൾ തമിഴ്നാട്ടിലേക്ക് കടന്നു. ജില്ലാ പോലീസ് മേധാവി വൈഭവ് സക്സേനയുടെ നേതൃത്വത്തിൽ പ്രത്യേക ടീം രൂപീകരിച്ച് അന്വേഷണമാരംഭിച്ചു.
പ്രതി കർണ്ണാടകയിലേക്കും, അവിടെ നിന്ന് ആന്ധ്രയിലേക്കും കടന്നു. കഴിഞ്ഞ ദിവസം ഇയാൾ രഹസ്യമായി ജില്ലയിലെത്തി. ലാലുവിന്റെ നീക്കം പിന്തുടർന്ന പോലീസ് സാഹസികമായി പിടികൂടുകയായിരുന്നു. പെരുമ്പാവൂർ , ഊന്നുകൽ, കുറുപ്പംപടി, കോടനാട്, കുട്ടമ്പുഴ, കണ്ണൂർ ടൗൺ, തൃശൂർ ഈസ്റ്റ് പോലീസ് സ്റ്റേഷനുകളിലായി നിരവധി ക്രമിനൽ കേസുകളിൽ പ്രതിയാണ്.
പെരുമ്പാവൂർ എഎസ്പി ശക്തി സിംഗ് ആര്യ, മൂവാറ്റുപുഴ ഡിവൈഎസ്പി പി. എം. ബൈജു, കുട്ടമ്പുഴ എസ്എച്ച്ഒ പി.എ. ഫൈസൽ, സീനിയർ സിപിഒ എം. കെ ഷിയാസ്, സിപിഒമാരായ ടി. എം ഷെഫീഖ്, സഞ്ജു ജോസ് എന്നിവരാണ് അന്വേഷണ സംഘത്തിലുണ്ടായിരുന്നത്.
പ്രതികരിക്കാൻ ഇവിടെ എഴുതുക: