കൊല്ലം: കേരള ഹോക്കി സംസ്ഥാന സീനിയര്‍ പുരുഷ വിഭാഗം ചാമ്പ്യന്‍ഷിപ്പില്‍ നിലവിലെ ചാമ്പ്യന്‍മാരായ മലപ്പുറത്തെ തോല്‍പ്പിച്ച് എറണാകുളം ജേതാക്കളായി. മൂന്നിനെതിരെ ഏഴ് ഗോളുകള്‍ക്കായിരുന്നു എറണാകുളത്തിന്റെ ജയം. മത്സരത്തിന്റെ ആദ്യ ക്വാര്‍ട്ടറില്‍ തന്നെ എറണാകുളം മുന്നിലെത്തി.
മൂന്നാം സ്ഥാനത്തിനുള്ള മത്സരത്തില്‍ കോഴിക്കോട് തിരുവനന്തപുരത്തെ പെനാല്‍റ്റി ഷൂട്ടൗട്ടില്‍ പരാജയപ്പെടുത്തി. മത്സരത്തില്‍ നിശ്ചിത സമയം പിന്നിട്ടപ്പോള്‍ ഇരുടീമുകളും രണ്ട് ഗോള്‍ വീതം നേടി സമനിലയില്‍ പിരിയുകയായിരുന്നു. രണ്ട് തവണ ലീഡ് എടുത്ത ശേഷമാണ് തിരുവനന്തപുരം ജില്ല ഗോള്‍ വഴങ്ങിയത്.
പെനാല്‍റ്റിയിലേക്ക് നീങ്ങിയ മത്സരത്തില്‍ കോഴിക്കോടിന്റെ ഗോള്‍ കീപ്പര്‍ മുഹമ്മദ് കെ.എച്ച് തിരുവനന്തപുരത്തിന്റെ രണ്ട് പെനാല്‍റ്റി തട്ടിഅകറ്റി. കോഴിക്കോട് ടീമിലെ എല്ലാ താരങ്ങും പെനാല്‍റ്റി ഗോളാക്കി മാറ്റി.
എറണാകുളം ജില്ലയുടെ ഗോള്‍ കീപ്പര്‍ സഹല്‍ കെ.എ. ആണ് മികച്ച ഗോള്‍ കീപ്പര്‍, മലപ്പുറത്തിന്റെ മുഹമ്മദ് ഷിയാസ് കെ. മികച്ച പ്രതിരോധ താരവും തിരുവനന്തപുരത്തിന്റെ അഖില്‍ എസ് മികച്ച ഫോര്‍വേര്‍ഡുമായി.
ചാമ്പ്യന്‍ഷിപ്പിന്റെ സമാപന പരിപാടിയില്‍ കൊല്ലം ജില്ലാ സ്പോര്‍ട്സ് കൗണ്‍സില്‍ പ്രസിഡന്റ് എക്സ് ഏണെസ്റ്റ് മുഖ്യാതിഥിയായി, കേരള ഹോക്കി സംസ്ഥാന സെക്രട്ടറി സി.ടി. സോജി അധ്യക്ഷത വഹിച്ചു. ജില്ലാ സ്പോര്‍ട്സ് കൗണ്‍സില്‍ എക്സിക്യൂട്ടീവ് മെമ്പര്‍ രാധാകൃഷ്ണ പിള്ള, ജില്ലാ ഒളിമ്പിക് അസോസിയേഷന്‍ സെക്രട്ടറി ജയകൃഷ്ണന്‍, മുന്‍ ഇന്ത്യ താരം ബിപിന്‍ ഫെര്‍ണാണ്ടസ്, സെലക്ടര്‍ ഷണ്‍മുഖന്‍, റിട്ട ആര്‍മി ഓഫിസര്‍ സന്തോഷ് കുമാര്‍, കൊല്ലം ഹോക്കി പ്രസിഡന്റ് രാധാകൃഷ്ണന്‍ നായര്‍, സെക്രട്ടറി ഡോ.എംജെ മനോജ് എന്നിവര്‍ സംസാരിച്ചു.
പ്രതികരിക്കാൻ ഇവിടെ എഴുതുക: