കൊച്ചി: ഗുണ്ടാ നേതാവ് ഓംപ്രകാശ് ഉള്‍പ്പെട്ട ലഹരിക്കേസില്‍ നടന്‍ ശ്രീനാഥ് ഭാസിയെ ചോദ്യം ചെയ്ത് വിട്ടയച്ചു. കൊച്ചി മരട് പൊലീസ് സ്‌റ്റേഷനില്‍ ചോദ്യം ചെയ്യില്‍ 4. 30 മണിക്കൂര്‍ നീണ്ടു നിന്നു. ലഹരി ഉപയോഗിച്ചില്ലെന്നും ഓംപ്രകാശിനെ അറിയില്ലെന്നുമാണ് ശ്രീനാഥ് ഭാസി പൊലീസിനോട് പറഞ്ഞത്.
ഹോട്ടല്‍ മുറിയിലെത്തിയത് സുഹൃത്തായ ബിനു ജോസഫിനൊപ്പമാണെന്നും ഇയാളുമായി സാമ്പത്തിക ഇടപാടുകള്‍ ഉണ്ടെന്നും ശ്രീനാഥ് ഭാസി പൊലീസിന് നല്‍കിയ മൊഴിയിലുണ്ട്.
വ്യാഴാഴ്ച രാവിലെ 11.45 ഓടെയാണ് ശ്രീനാഥ് ഭാസി മരട് പൊലീസ് സ്‌റ്റേഷനിലെത്തിയത്.
നടി പ്രയാഗ മാര്‍ട്ടിനും നടന്‍ ശ്രീനാഥ് ഭാസിയും കൊച്ചിയിലെ ആഡംബര ഹോട്ടലില്‍ ഓം പ്രകാശുണ്ടായിരുന്ന മുറിയിലെത്തിയെന്നാണ് പൊലീസ് റിമാന്‍ഡ് റിപ്പോര്‍ട്ടിലുളളത്. ഇവരെ കൂടാതെ മറ്റ് ഇരുപത് പേരും ഓം പ്രകാശിനെ സന്ദര്‍ശിച്ചെന്നാണ് പൊലീസ് പറയുന്നത്. മുറിയില്‍ ലഹരിപാര്‍ട്ടി നടന്നെന്നാണ് അന്വേഷണസംഘത്തിന്റെ നിഗമനം. റിമാന്‍ഡ് റിപ്പോര്‍ട്ടില്‍ പേരുള്ള 20 പേരില്‍ മറ്റ് ചിലരെയും അന്വേഷണസംഘം ബന്ധപ്പെട്ടിട്ടുണ്ട്. ഓംപ്രകാശ് താമസിച്ചിരുന്ന മുറിയില്‍ ലഹരിയുടെ അംശം കണ്ടെത്തി എന്നാണ് വിവരം.
കൊച്ചിയില്‍ ബോള്‍ഗാട്ടിയില്‍ അലന്‍ വാക്കറുടെ ഡി ജെ ഷോയില്‍ പങ്കെടുക്കാന്‍ എന്ന പേരില്‍ ഹോട്ടലില്‍ മുറി എടുത്താണ് ലഹരി ഉപയോഗമെന്നാണ് പൊലീസ് പറയുന്നത്. ബോബി ചലപതി എന്നയാളുടെ പേരില്‍ ബുക്ക് ചെയ്ത മുറിയില്‍ സംഘടിച്ചവര്‍ ലഹരി ഉപയോഗിച്ചു. എല്ലാത്തിനും ചുക്കാന്‍ പിടിച്ചതും പാര്‍ട്ടിയുടെ ഭാഗമായതും ഗുണ്ടാ തലവന്‍ ഓം പ്രകാശാണെന്നും എളമക്കരക്കാരനായ ബിനു ജോസഫ് വഴിയാണ് ശ്രീനാഥ് ഭാസിയും പ്രയാഗയും മുറിയില്‍ എത്തിയതെന്നും പൊലീസ് പറയുന്നു.
പ്രതികരിക്കാൻ ഇവിടെ എഴുതുക: