ഷിംല ; സംസ്ഥാനത്തെ വഴിയോരക്കച്ചവടക്കാർക്ക് കർശനമായ നിയമങ്ങൾ നടപ്പാക്കാൻ ഹിമാചൽ പ്രദേശ് സർക്കാർ . ശുദ്ധവും സുരക്ഷിതവുമായ ഭക്ഷണം ഉപഭോക്താക്കളിലേക്ക് എത്തുന്നുവെന്ന് ഉറപ്പാക്കാനാണ് നീക്കം. വിഷയത്തിൽ വിശദമായ ചർച്ചയ്‌ക്ക് ശേഷമാണ് സർക്കാർ നടപടി സ്വീകരിച്ചതെന്ന് മന്ത്രി വിക്രമാദിത്യ സിംഗ് പറഞ്ഞു.
‘ ജനങ്ങൾക്ക് വളരെയേറെ ആശങ്കയുണ്ട്. പ്രത്യേകിച്ച് വഴിയോരക്കച്ചവടക്കാരുടെ ശുചിത്വവും ശ്രദ്ധിക്കാത്ത രീതി. ഉത്തർപ്രദേശിലെ വഴിയോരക്കച്ചവടക്കാർക്ക് അവരുടെ പേരും ഐഡിയും അച്ചടിക്കുന്നത് നിർബന്ധമാക്കിയ അതേ രീതിയിൽ, ഹിമാചലിലും ഇത് ശക്തമായി നടപ്പിലാക്കാൻ ഞങ്ങൾ തീരുമാനിച്ചു.‘ – വിക്രമാദിത്യ സിംഗ് പറഞ്ഞു.
സംസ്ഥാനത്തെ ശുചിത്വവും ആരോഗ്യപ്രശ്നങ്ങളും കണക്കിലെടുത്താണ് ഈ നടപടിയെന്നും മന്ത്രി പറഞ്ഞു. എല്ലാ വഴിയോര കച്ചവടക്കാരും തങ്ങളുടെ സ്റ്റാളുകളിൽ പേരും തിരിച്ചറിയൽ കാർഡും നിർബന്ധമായും പ്രദർശിപ്പിക്കണം. ഉപഭോക്താക്കൾക്ക് മികച്ചതും വൃത്തിയുള്ളതുമായ സേവനങ്ങൾ നൽകുക എന്നതാണ് ഈ സംരംഭത്തിന് പിന്നിലെ സർക്കാരിന്റെ ലക്ഷ്യം.
സർക്കാരിന്റെ ഈ തീരുമാനം പ്രദേശവാസികൾക്കും വിനോദസഞ്ചാരികൾക്കും ഒരു വലിയ ആശ്വാസ നടപടിയാകും . ഇത് വഴിയോര ഭക്ഷണം ആത്മവിശ്വാസത്തോടെ ആസ്വദിക്കാൻ അവരെ പ്രാപ്തരാക്കുമെന്നും മന്ത്രി പറഞ്ഞു.
പ്രതികരിക്കാൻ ഇവിടെ എഴുതുക: