മകളുടെ കാമുകനെ വീട്ടിൽ വിളിച്ചു വരുത്തി മർദ്ദിച്ചു കൊന്നു : യുവതിയുടെ പിതാവും, ബന്ധുക്കളും അറസ്റ്റിൽ

പട്ന : മകളുടെ കാമുകനെ വീട്ടിലേക്ക് വിളിച്ചുവരുത്തി മർദിച്ചു കൊന്നു.ബിഹാറിലെ കതിഹാറിലാണ് സംഭവം.ബരാരി മർഗിയ സ്വദേശിയായ വിശാൽ കുമാറാണ് മരിച്ചത്.വിശാലിന്റെ കാമുകിയുടെ പിതാവ് അഖിലേഷ് യാദവ്, ബന്ധുക്കളായ നിരഞ്ജൻ കുമാർ യാദവ്, രവികുമാർ യാദവ് എന്നിവരെ പോലീസ് അറസ്റ്റ് ചെയ്തു.

വെള്ളിയാഴ്ച, ബുരാരി പോലീസ് സ്റ്റേഷൻ പരിധിയിലെ കഡഗോള റെയിൽവേ സ്റ്റേഷന് സമീപത്ത് നിന്നാണ് യുവാവിന്റെ മൃതദേഹം കണ്ടെത്തിയത്. കൈകളും കാലുകളും കെട്ടിയിട്ട നിലയിലായിരുന്നു മൃതദേഹം.

കതിഹാർ ഡിഎസ്എസ് കോളേജിന് സമീപത്തെ ലോഡ്ജിൽ താമസിച്ചാണ് മകൻ പഠിച്ചിരുന്നതെന്നും, ആരുമായും ശത്രുത ഉണ്ടായിരുന്നില്ലെന്നും വിശാലിന്റെ പിതാവ് അരവിന്ദ് പോലീസിനോട് പറഞ്ഞിരുന്നു.

അന്വേഷണത്തിൽ ഈസ്റ്റ് ബരിനഗർ നിവാസി അഖിലേഷ് യാദവിന്റെ മകളുമായി വിശാൽ പ്രണയത്തിലായിരുന്നുവെന്ന് വ്യക്തമായതായി കതിഹാർ എസ്പി വൈഭവ് ശർമ പറഞ്ഞു. ഇത് ഇഷ്ടപ്പെടാത്ത അഖിലേഷ് വിശാലിനെ കൊല്ലാൻ പദ്ധതിയിട്ടു. അഖിലേഷും രണ്ടു ബന്ധുക്കളും ചേർന്ന് വിശാലിനെ വീട്ടിലേക്ക് വിളിച്ചുവരുത്തി.കൈയും കാലും കെട്ടി ക്രൂരമായി മർദിച്ച് കൊലപ്പെടുത്തുകയായിരുന്നു. തെളിവ് നശിപ്പിക്കാനാണ് മൃതദേഹം ഉപേക്ഷിച്ചതെന്നും പ്രതികൾ പോലീസിനോട് പറഞ്ഞു.