തിരുവനന്തപുരം: വിദേശത്ത് ജോലി വാഗ്ദാനം ചെയ്ത് കോടികള്‍ തട്ടിയതായി പരാതി. തിരുവനന്തപുരം ശാസ്തമംഗലത്ത് പ്രവര്‍ത്തിക്കുന്ന ബ്രൂക്ക്‌പോര്‍ട്ട് ട്രാവല്‍ ആന്‍ഡ് ലോജിസ്റ്റിക്‌സ് പ്രൈവറ്റ് ലിമിറ്റഡ് എന്ന സ്ഥാപനത്തിനെതിരെയാണ് പരാതി ഉയര്‍ന്നത്.
ദമ്പതികളും മകനും നടത്തുന്ന റിക്രൂട്ട്‌മെന്റ് കമ്പനി അഞ്ച് കോടിയോളം രൂപ തട്ടിയെന്നാണ് ആരോപണം. ഡോള്‍സി ജോസഫൈന്‍ സജു, ഇവരുടെ ഭര്‍ത്താവ് സജു, മകന്‍ രോഹിത് സജു എന്നിവരുടെ ഉടമസ്ഥതയിലുള്ളതാണ് സ്ഥാപനം. വിവിധ പോലീസ് സ്‌റ്റേഷനുകളിലായി നിരവധി കേസുകള്‍ ഇവര്‍ക്കെതിരെ രജിസ്റ്റര്‍ ചെയ്തിട്ടുണ്ട്.
വിദേശരാജ്യങ്ങളില്‍ ജോലി വാഗ്ദാനം ചെയ്ത് സ്ഥാപനം പരസ്യം നല്‍കിയിരുന്നു. തുടര്‍ന്നാണ് യുവാക്കള്‍ ഇവരെ സമീപിച്ചത്. വിസ പ്രൊസസിങ് ആരംഭിച്ചുവെന്ന് ബോധിപ്പിച്ച് ഇവരില്‍ നിന്ന് പണവും വാങ്ങി. 43 യുവാക്കളാണ് നിലവില്‍ പരാതി നല്‍കിയിരിക്കുന്നത്. ഇവരെക്കൂടാതെ നൂറോളംപേര്‍ തട്ടിപ്പിനിരയായതായും പറയുന്നുണ്ട്. റിക്രൂട്ട്‌മെന്റ് കമ്പനി അഞ്ച് കോടിയോളം രൂപ തട്ടിയെടുത്തെന്നാണ് ഉേദ്യാഗാര്‍ത്ഥികള്‍ ആരോപിക്കുന്നത്. ഇത്രയും പേര്‍ ചതിയില്‍പ്പെട്ടെന്ന് ഇവിടെ വന്നപ്പോഴാണ് മനസിലായതെന്ന് ഉദ്യോഗാര്‍ത്ഥികള്‍ പറയുന്നു. ജോലിയും വിസയും ലഭ്യമാകാതെ വന്നതോടെയാണ് ഇവര്‍ പരാതിയുമായി മുന്നോട്ടുവന്നത്. പണത്തിനായി സമീപിക്കുമ്പോള്‍ ഉടമകള്‍ ഫോണെടുക്കുന്നില്ലെന്നും പരാതിയിലുണ്ട്. ഇവര്‍ സ്ഥലത്തുണ്ടോ എന്നും അറിവില്ല.
2.5 ലക്ഷം മുതല്‍ പത്ത് ലക്ഷം വരെയാണ് ഒരാളില്‍ നിന്നും ഇവര്‍ വാങ്ങിയിട്ടുള്ളത്. വിദ്യാഭ്യാസ യോഗ്യത ആവശ്യമില്ലാത്ത ജോലിക്കാണ് ഇവര്‍ ആളുകളെ വിളിച്ചത്. അഭിമുഖവും നടത്തിയിരുന്നില്ല. സംസ്ഥാന വ്യാപകമായി ഇവര്‍ വിസത്തട്ടിപ്പ് നടത്തിയെന്നാണ് പരാതിയിലെ ആരോപണം. കേരളത്തിലെ എല്ലാ ജില്ലക്കാരില്‍ നിന്നും ഇവര്‍ പണം വാങ്ങിയിട്ടുണ്ട്. എന്നാല്‍, സ്ഥാപനം തകര്‍ക്കാനുള്ള ഗൂഢനീക്കമാണ് പരാതിക്ക് പിന്നിലെന്ന് സ്ഥാപന ഉടമ ഡോള്‍സി ജോസഫൈന്‍ സജു ആരോപിച്ചു. പരാതി സമര്‍പ്പിച്ചവരുമായി നിബന്ധനകളും വ്യവസ്ഥകളും നേരത്തെ സംസാരിച്ചിരുന്നു. റിക്രൂട്ട്‌മെന്റ് വൈകിയതായി സമ്മതിക്കുന്നതായും അവര്‍ വ്യക്തമാക്കി.
പ്രതികരിക്കാൻ ഇവിടെ എഴുതുക: