തിരുവനന്തപുരം: ഹോക്കി താരം പിആര്‍ ശ്രീജേഷിനെ സ്വീകരണം നല്‍കാന്‍ വിളിച്ച് വരുത്തി അപമാനിച്ച് സംസ്ഥാന സര്‍ക്കാര്‍. സ്വീകരണം നല്‍കുന്നതിനെ ചൊല്ലി കായിക-വിദ്യാഭ്യാസ മന്ത്രിമാര്‍ തമ്മിലുള്ള പോരാണ് പ്രശ്‌നമായത്.
ഇതോടെ തിങ്കളാഴ്ച നിശ്ചയിച്ച സ്വീകരണ പരിപാടി റദ്ദാക്കി. കായിക വകുപ്പ് മന്ത്രിയുടെ പരാതിയില്‍ മുഖ്യമന്ത്രി ഇടപെട്ട് വിദ്യാഭ്യാസ വകുപ്പിന്റെ സ്വീകരണം റദ്ദാക്കുകയായിരുന്നു.സ്വീകരണത്തിനായി കുടുംബസമേതം തിരുവനന്തപുരത്ത് എത്തിയ ശേഷമാണ് പരിപാടി മാറ്റിയ കാര്യം ശ്രീജേഷ് അറിഞ്ഞത്.
പാരീസ് ഒളിമ്പിക്‌സില്‍ വെങ്കല മേഡല്‍ നേടി വിരമിച്ച പിആര്‍ ശ്രീജേഷിന് വിദ്യാഭ്യാസ വകുപ്പാണ് സ്വീകരണം ഒരുക്കിയത്. സെന്‍ട്രല്‍ സ്റ്റേഡിയത്തില്‍ നിന്ന് ജിമ്മി ജോര്‍ജ്ജ് സ്റ്റേഡിയം വരെ ഘോഷയാത്ര നടത്തി വമ്പന്‍ സ്വീകരണമായിരുന്നു ആസൂത്രണം ചെയ്തത്. മുഖ്യമന്ത്രി ഉപഹാരം സമര്‍പ്പിക്കുന്ന ചടങ്ങിനെക്കുറിച്ച് ശനിയാഴ്ച വാര്‍ത്താസമ്മേളനത്തിലാണ് അറിയിച്ചത്.
പിന്നാലെ പരാതിയുമായി കായികമന്ത്രി മുഖ്യമന്ത്രിയെ സമീപിച്ചു. കായിക വകുപ്പാണ് ആദ്യം സ്വീകരണം നല്‍കേണ്ടതെന്നാണ് വാദം. ശനിയാഴ്ച സ്വീകരണം നടത്താനായിരുന്നു കായികവകുപ്പ് നീക്കം. എന്നാല്‍ മുഖ്യമന്ത്രിയുടെ ഡേറ്റ് കിട്ടിയില്ല. ഇതിനിടെയാണ് വിദ്യാഭ്യാസവകുപ്പ് സ്വീകരണത്തിന് നടപടി തുടങ്ങിയത്. കായികമന്ത്രി പരാതിപ്പെട്ടതോടെയാണ് മുഖ്യമന്ത്രിയുടെ ഓഫിസില്‍ നിന്നും പരിപാടി റദ്ദാക്കാന്‍ അറിയിപ്പെത്തിയത്.
പ്രതികരിക്കാൻ ഇവിടെ എഴുതുക: