തിരുവനന്തപുരം: ഓണക്കാലത്തെ വിലക്കയറ്റം തടയാനും അവശ്യ സാധനങ്ങള്‍ യഥേഷ്ടം ലഭ്യമാക്കാനും സപ്ലൈക്കോയ്ക്ക് വേണ്ടത് 600 കോടി രൂപ. പക്ഷെ സര്‍ക്കാര്‍ ഇന്നലെ അനുവദിച്ചത് വെറും 225 കോടി രൂപ. സപ്ലൈകോയ്‌ക്ക് 225 കോടി അനുവദിച്ചതായും ബജറ്റ് വകയിരുത്തലിനേക്കാള്‍ 120 കോടി രൂപ അധികമാണ് നല്‍കുന്നതെന്നും ധനമന്ത്രി കെ.എന്‍. ബാലഗോപാല്‍ പറഞ്ഞു.
വിപണി ഇടപെടല്‍ ഉള്‍പ്പെടെയുള്ള ആവശ്യങ്ങള്‍ക്ക് സപ്ലൈകോ 600 കോടിയാണ് ആവശ്യപ്പെട്ടിരുന്നത്. വിപണി ഇടപെടലിനും സാധനങ്ങള്‍ വാങ്ങിയ ഇനത്തില്‍ കരാര്‍ കമ്പനികള്‍ക്ക് കുടിശിക നല്‍കുന്നതുമായി ബന്ധപ്പെട്ടും മാസങ്ങള്‍ക്ക് മുമ്പുതന്നെ സപ്ലൈകോ ധനവകുപ്പിനോട് അധിക തുക ആവശ്യപ്പെട്ടിരുന്നു. ഈ സാഹചര്യത്തിലാണ് 225 കോടി രൂപ മാത്രം നല്‍കി ധനവകുപ്പ് കൈകഴുകിയത്.
സാധനവില നിയന്ത്രിക്കാനും വിപണി ഇടപെടലിനുമായിട്ട് 600 കോടിയുടെ ആവശ്യമുണ്ട്. നേരത്തെ 150 കോടി രൂപ അനുവദിച്ചിരുന്നെങ്കിലും ഇത് ഭക്ഷ്യസാധനങ്ങള്‍ കൃത്യമായി എത്തിക്കാന്‍ തികഞ്ഞിരുന്നില്ല. ഉത്സവക്കാലത്ത് വിപണിയില്‍ സാധനങ്ങളുടെ വില കൂടാനിടയുണ്ട്.
പഞ്ചസാര ഉള്‍പ്പെടെയുള്ള സാധനങ്ങള്‍ ഓണത്തിന് മുന്നേ തന്നെ സപ്ലൈകോ ഔട്ട്‌ലെറ്റുകളില്‍ ലഭ്യമാക്കേണ്ടതുണ്ട്. നിരവധി തവണ ഈ വിഷയം ഭക്ഷ്യവകുപ്പ് ധനവകുപ്പിനെ അറിയിച്ചിട്ടുണ്ടായിരുന്നുവെന്ന് സപ്ലൈകോ അധികൃതര്‍ പറയുന്നു.
പ്രതികരിക്കാൻ ഇവിടെ എഴുതുക: