തമിഴ് ഹാസ്യതാരം പ്രദീപ് കെ വിജയന്‍ മരിച്ചനിലയില്‍. ബുധനാഴ്ച താരത്തിന്റെ ചെന്നൈയിലെ വസതിയില്‍ തന്നെയാണ് പ്രദീപിനെ മരിച്ചനിലയില്‍ കണ്ടെത്തിയത്. രണ്ട് ദിവസമായി നടന്റെ വിവരം ഇല്ലാതായതോടെ നടന്റെ സുഹൃത്ത് അന്വേഷിച്ച് ചെന്നപ്പോഴാണ് നടന്റെ മരണവിവരം അറിഞ്ഞത്. സംഭവത്തില്‍ പൊലീസ് അന്വേഷണം ആരംഭിച്ചിട്ടുണ്ട്.
അവിവിവാഹിതനായ പ്രദീപ് ചെന്നൈയിലെ ശങ്കരപുരത്ത് പാലവക്കത്ത് ആണ് താമസിച്ചിരുന്നത്. താന്‍ എത്തുമ്പോള്‍ മുറി അകത്ത് നിന്നും പൂട്ടിയ അവസ്ഥയിലായിരുന്നു. ദുര്‍ഗന്ധം വന്നു തുടങ്ങിയിരുന്നു എന്ന് സുഹൃത്ത് പൊലീസിനോട് പറഞ്ഞു. സംശയം തോന്നിയപ്പോള്‍ തന്നെ പൊലീസില്‍ വിവരം അറിയിക്കുകയായിരുന്നു.
പൊലീസ് എത്തി കതക് കുത്തി തുറന്ന് അകത്ത് കടന്നപ്പോഴാണ്, കുളിമുറിയില്‍ പ്രദീപിനെ മരിച്ച നിലയില്‍ കണ്ടെത്തിയത്. മരണം സംഭവിച്ചിട്ട് രണ്ട് ദിവസം കഴിഞ്ഞു എന്നാണ് പ്രാഥമിക വിവരം. ഹൃദയാഘാതം ഉണ്ടായതാവാം മരണകാരണം എന്നാണ് സൂചന. മറ്റ് ചില ആരോഗ്യ പ്രശ്നങ്ങള്‍ക്ക് പ്രദീപ് മരുന്ന് കഴിക്കുന്നതായി സുഹൃത്തുക്കള്‍ പറയുന്നു.
അടിക്കടി തലകറങ്ങി വീഴുകുകയും, അതിന് ചികിത്സ തേടുകയും ചെയ്തിരുന്നുവത്രെ. പോസ്റ്റ്മോര്‍ട്ടത്തിനായി മൃതദേഹം രായപ്പേട്ട ആശുപത്രിയിലേക്ക് മാറ്റി. 2013ല്‍ പുറത്തിറങ്ങിയ മിര്‍ച്ചി ശിവ നായകനായ സൊന്ന പുരിയാത് എന്ന ചിത്രത്തിലൂടെയാണ് പ്രദീപ് കെ വിജയന്‍ അഭിനയരംഗത്ത് എത്തിയത്.
തെഗിടി എന്ന ചിത്രത്തിലെ വേഷം ശ്രദ്ധിക്കപ്പെട്ടതോടെ നിരവധി അവസരങ്ങള്‍ നടനെ തേടിയെത്തി. ഒരുനാള്‍ കൂത്ത്, എന്നോട് വിളയാട്, മീസയെ മുറുക്ക്, മേയാത മാന്‍, തിരുട്ടു പയലേ 2, ടെഡ്ഡി, ഇരുമ്പുതിരൈ, ഹേയ് സിനാമിക എന്നിങ്ങനെ നിരവധി സിനിമകളില്‍ അഭിനയിച്ചിട്ടുണ്ട്. അഭിനയത്തിന് പുറമെ നിരവധി സിനിമകളില്‍ പ്രദീപ് സബ്ടൈറ്റിലിങ് ജോലിയും ചെയ്തിരുന്നു.
പ്രതികരിക്കാൻ ഇവിടെ എഴുതുക: