നാസിക്: ഭാരതത്തിന് ജമ്മു കശ്മീരിന്റെ ഒരു ഭാഗം നഷ്ടമാകാന്‍ കാരണം ചിലരുടെ കഴിവില്ലായ്മയും പിഴവുമാണെന്ന് വിദേശകാര്യ മന്ത്രി ഡോ. എസ് ജയശങ്കര്‍. മുന്‍ പ്രധാനമന്ത്രി ജവഹര്‍ ലാല്‍ നെഹ്‌റുവിനെയും കോണ്‍ഗ്രസിനെയുമാണ് ജയശങ്കര്‍ വിശ്വബന്ധു ഭാരത്’ എന്ന പരിപാടിയില്‍ പങ്കെടുത്ത് പരോക്ഷമായി വിമര്‍ശിച്ചത്.
ചൈന- പാകിസ്ഥാന്‍ സാമ്പത്തിക ഇടനാഴി കടന്നുപോകുന്നത് പാക് അധീന ജില്‍ജിത്ത് ബാള്‍ട്ടിസ്ഥാനിലൂടെയാണ്. പാക് അധീന കശ്മീര്‍ തിരികെ യോജിപ്പിക്കാന്‍ ഭാരതം ലക്ഷ്മണ രേഖ കടന്നാല്‍ ചൈന എങ്ങനെ പ്രതികരിക്കുമെന്ന ചോദ്യത്തിനായിരുന്നു ജയശങ്കറിന്റെ മറുപടി. ”അവിടെ ലക്ഷ്മണരേഖ എന്നൊന്ന് ഉണ്ടെന്ന് ഞാന്‍ വിശ്വസിക്കുന്നില്ല. പാക്കധീന കശ്മീര്‍ ഭാരതത്തിന്റെ ഭാഗമാണ്. ചിലരുടെ കഴിവില്ലായ്മയും പിഴവും കാരണം അത് താത്കാലികമായി നമ്മളില്‍ നിന്നും നഷ്ടപ്പെട്ടു,”.-
ചൈനയുടെ പാക്കധീന കശ്മീരിലെ കടന്നുകയറ്റത്തെ വിമര്‍ശിച്ച അദ്ദേഹം ചൈനയും പാകിസ്ഥാനും കാലങ്ങളായി ഒരുമിച്ച് ചേര്‍ന്ന് ഇത്തരം പ്രവര്‍ത്തങ്ങളില്‍ ഏര്‍പ്പെടുന്നുണ്ടെന്ന് ചൂണ്ടിക്കാട്ടി. എന്നാല്‍ ചൈനക്കോ പാകിസ്ഥാനോ പാക്കധീന കശ്മീരില്‍ പരമാധികാരം അവകാശപ്പെടാന്‍ ആവില്ല. അത് ഭാരതത്തിന്റെ മാത്രമാണ്.
1963 ല്‍ പാകിസ്ഥാന്‍ ഏകപക്ഷീയമായി ചൈനയ്‌ക്ക് പാക്കധീന കശ്മീരിന്റെ 5,000 കിലോമീറ്റര്‍ പ്രദേശം കൈമാറി. എന്നാല്‍ അതിര്‍ത്തി പ്രദേശത്തിന്റെ അവകാശം പാകിസ്ഥാനായാലും ഭാരതത്തിനായാലും അത് മാനിക്കുമെന്ന് ചൈന കരാറില്‍ വ്യക്തമാക്കിയിരുന്നതായി ജയശങ്കര്‍ പറഞ്ഞു. പത്തുവര്‍ഷം മുന്‍പ് ഈ വിഷയം സംസാരിക്കാനുള്ള ധൈര്യംപോലും ഇവിടെ ആര്‍ക്കും ഉണ്ടായിരുന്നില്ല. എന്നാല്‍ ഇന്ന് അത് മാറി. ഇന്നത്തെ ഭാരത സമൂഹം പാക്കധീന കശ്മീര്‍ തിരിച്ചുപിടിക്കുമെന്ന ആത്മവിശ്വാസമുള്ളവരാണെന്നും അദ്ദേഹം പറഞ്ഞു.
പ്രതികരിക്കാൻ ഇവിടെ എഴുതുക: