ജമ്മു: ജമ്മു കശ്മീരിലെ രജൗരി ജില്ലയിൽ സർക്കാർ ജീവനക്കാരനെ കൊലപ്പെടുത്തിയ സംഭവത്തിൽ നിരോധിത ലഷ്‌കർ-ഇ-തൊയ്ബയുടെ “അബു ഹംസ” എന്ന വിദേശ ഭീകരനാണെന്ന് പോലീസ്. ഇയാളെ കുറിച്ച് വിവരം നൽകുന്നവർക്ക് 10 ലക്ഷം രൂപ പാരിതോഷികം പ്രഖ്യാപിക്കുകയും ചെയ്തു.
താനമാണ്ടി പ്രദേശത്തെ കുണ്ട ടോപ്പ് വില്ലേജിൽ മുഹമ്മദ് റസാഖ് (40) തിങ്കളാഴ്ച കൊല്ലപ്പെട്ടിരുന്നു. സഹോദരൻ മുഹമ്മദ് താഹിർ ചൗധരി ടെറിട്ടോറിയൽ ആർമിയിൽ സൈനികനായിരുന്നു. ഗ്രാമത്തിലെ ഒരു ടെറിട്ടോറിയൽ ആർമി ഉദ്യോഗസ്ഥന്റെ വളപ്പിലേക്ക് ലഷ്‌കർ-ഇ-തൊയ്ബയുമായി ബന്ധമുള്ള രണ്ട് ഭീകരർ അതിക്രമിച്ചു കയറി വെടിയുതിർക്കുകയായിരുന്നുവെന്ന് പോലീസ് പറഞ്ഞു. എന്നാൽ ആക്രമണത്തിൽ നിന്ന് ചൗധരി പരിക്കേൽക്കാതെ രക്ഷപ്പെട്ടു.
താനാമണ്ടി പോലീസ് സ്റ്റേഷനിൽ ഒരു കേസ് ഫയൽ ചെയ്തിട്ടുണ്ട്. ഈ തീവ്രവാദ പ്രവർത്തനത്തിൽ ഏർപ്പെട്ടിരിക്കുന്ന ഓരോ വ്യക്തിയെയും കണ്ടെത്താൻ അന്വേഷണം ആരംഭിച്ചിട്ടുണ്ടെന്നും ഉദ്യോഗസ്ഥർ പറഞ്ഞു.
അബു ഹംസ എന്ന കോഡ് നാമത്തിൽ അക്രമികളിൽ ഒരാളെ വിദേശ ഭീകരനാണെന്ന് തിരിച്ചറിയുന്ന വിശ്വസനീയമായ തെളിവുകൾ ലഭിച്ചതായി വക്താവ് പറഞ്ഞു. രജൗരി-പൂഞ്ച് ഇരട്ട ജില്ലകളിൽ വിന്യസിച്ചിരിക്കുന്ന പോലീസും സുരക്ഷാ സേനയും ഈ ഗ്രൂപ്പിനെ നിർവീര്യമാക്കാൻ പ്രവർത്തിക്കുന്നുണ്ടെന്നും പോലീസ് കൂട്ടിച്ചേർത്തു. ഭീകരനെക്കുറിച്ച് വിവരം നൽകുന്നവർക്ക് 10 ലക്ഷം രൂപ പാരിതോഷികം പ്രഖ്യാപിച്ചിട്ടുണ്ടെന്നും ഇയാളുടെ സാദൃശ്യമുള്ള പോസ്റ്റർ പുറത്തിറക്കി പോലീസ് അറിയിച്ചു.
32 കാരനായ ഭീകരൻ പഠാണി സ്യൂട്ട് ധരിച്ച് തവിട്ട് നിറത്തിലുള്ള ഷാളും ഓറഞ്ച് ബാഗും ധരിച്ചിരുന്നു. ഇയാൾ ഷദ്ര ഷെരീഫ്, ദേർ കി ഗലി പ്രദേശങ്ങളിൽ പ്രവർത്തിക്കുന്നുണ്ടെന്നും നിരവധി തീവ്രവാദ പ്രവർത്തനങ്ങളിൽ ഏർപ്പെട്ടിട്ടുണ്ടെന്നും പോലീസ് പറഞ്ഞു. വിവരം നൽകുന്നയാളുടെ വിവരങ്ങൾ രഹസ്യമായി സൂക്ഷിക്കുമെന്നും പോലീസ് വക്താവ് പറഞ്ഞു.
പ്രതികരിക്കാൻ ഇവിടെ എഴുതുക: