പെര്‍ത്ത്: ഓസ്‌ട്രേലിയന്‍ പര്യടനത്തിലുള്ള ഭാരത ഹോക്കി ടീമിന് പരമ്പരയിലെ മൂന്നാം മത്സരത്തിലും തോല്‍വി. ഇതോടെ അഞ്ച് മത്സര പരമ്പര 3-0ന് മുന്നിലെത്തിയ ആതിഥേയര്‍ സ്വന്തമാക്കി. പരാജയപ്പെട്ടെങ്കിലും പരമ്പരയില്‍ ആദ്യമായ് ഭാരത താരങ്ങള്‍ തകര്‍പ്പന്‍ പ്രകടനം കാഴ്‌ച്ചവച്ച മത്സരമായിരുന്നു ഇന്നലത്തേത്.
ഓസ്‌ട്രേലിയ പതിവുപോലെ അറ്റാക്കിങ് ഗെയിമിലൂടെ തുടങ്ങി. ഭാരതത്തിന്റെ പ്രതിരോധ നിരയുടെ ക്ലാസിക് ചെറുത്തുനില്‍പ്പില്‍ ഓസ്‌ട്രേലിയ പരുങ്ങി. ആദ്യ രണ്ട് ക്വാര്‍ട്ടറുകളിലായി നിരവധി പെനല്‍റ്റി കോര്‍ണറുകളാണ് ഓസ്‌ട്രേലിയ നേടിയെടുത്തത്. പക്ഷെ ഒന്നില്‍ പോലും വിജയം കാണാന്‍ സാധിച്ചില്ല. മലയാളി ഗോള്‍കീപ്പര്‍ പി.ആര്‍. ശ്രീജേഷിന്റെ തകര്‍പ്പന്‍ പ്രകടനമാണ് ടീമിന് ഗുണമായത്.
കളിയില്‍ ആദ്യം ലീഡ് ചെയ്ത ശേഷമായിരുന്നു ഭാരതത്തിന്റെ തോല്‍വി. 41-ാം മിനിറ്റില്‍ പെനല്‍റ്റി കോര്‍ണറില്‍ നിന്ന് ജുഗ്‌രാജ് സിങ് ആണ് ഭാരതത്തിനായി ഗോള്‍ നേടിയത്. പിന്നീട് 44, 49 മിനിറ്റുകളില്‍ ഓസ്‌ട്രേലിയയുടെ ജെറെമി ഹേവാര്‍ഡ് ഇരട്ട ഗോള്‍ നേടി ആതിഥേയരെ വിജയത്തിലെത്തിച്ചു. പരമ്പരയിലെ ആദ്യ മത്സരത്തില്‍ 5-1ന്റെ വമ്പന്‍ പരാജയമാണ് ഭാരതം ഏറ്റുവാങ്ങിയത്. രണ്ടാം മത്സരത്തില്‍ 4-2നും തോറ്റു. ശേഷിക്കുന്ന രണ്ട് മത്സരങ്ങള്‍ നാളെയും മറ്റന്നാളുമായി നടക്കും.
പ്രതികരിക്കാൻ ഇവിടെ എഴുതുക: