യുപിയ: സന്തോഷ് ട്രോഫി ഫുട്‌ബോളില്‍ സെമി പ്രതീക്ഷയുമായി കേരളം ഇന്ന് ക്വാര്‍ട്ടര്‍ പോരാട്ടത്തിനിറങ്ങുന്നു. കരുത്തരായ മിസോറാമാണ് എതിരാളികള്‍. രാത്രി ഏഴിന് ഗോള്‍ഡന്‍ ജൂബിലി സ്‌റ്റേഡിയത്തിലാണ് മത്സരം. ഗ്രൂപ്പ് എയില്‍ നിന്ന് സര്‍വീസസിനും ഗോവയ്‌ക്കും പിന്നില്‍ മൂന്നാമതായാണ് കേരളം ക്വാര്‍ട്ടറില്‍ പ്രവേശിച്ചത്.
ഗ്രൂപ്പില്‍ കളിച്ച അഞ്ചില്‍ രണ്ട് വീതം ജയവും സമനിലയും ഒരു തോല്‍വിയുമടക്കം 8 പോയിന്റാണ് കേരളം സ്വന്തമാക്കിയത്. ആസാമിനെയും അരുണാചല്‍പ്രദേശിനെയും തോല്‍പ്പിച്ചപ്പോള്‍ സര്‍വീസസുമായും മേഘാലയയുമായും സമനില പാലിച്ചു. ഗോവയോട് തോല്‍ക്കുകയും ചെയ്തു.
കഴിഞ്ഞ കളികളില്‍ മധ്യ-പ്രതിരോധ നിരയില്‍ സംഭവിച്ച പാളിച്ചകള്‍ പരിഹരിച്ചാലേ ഇന്ന് മിസോറാമിനെതിരെ ജയിച്ച് സെമിയിലെത്താനാകൂ. ഗ്രൂപ്പിലെ അഞ്ച് കളികളില്‍ 7 ഗോളടിച്ച കേരളം അഞ്ചെണ്ണം വഴങ്ങുകയും ചെയ്തു. ഗ്രൂപ്പ് ബിയില്‍ രണ്ടാം സ്ഥാനക്കാരായാണ് മിസോറാം ക്വാര്‍ട്ടറിലെത്തിയത്. ഗ്രൂപ്പില്‍ കളിച്ച അഞ്ചില്‍ രണ്ട് വിജയവും ഒരു സമനിലയും രണ്ട് തോല്‍വിയുമടക്കം 7 പോയിന്റ് നേടി മണിപ്പൂരിന് പിന്നില്‍ രണ്ടാം സ്ഥാനക്കാരായാണ് ക്വാര്‍ട്ടറിലെത്തിയത്.
പ്രതികരിക്കാൻ ഇവിടെ എഴുതുക: