കൊല്‍ക്കത്ത: ഉത്തര്‍ ദിനാജ്പൂര്‍ ജില്ലയിലെ ചോപ്രയില്‍ ഇന്ത്യ-ബംഗ്ലാദേശ് അതിര്‍ത്തിക്ക് സമീപം ഡ്രെയിനേജ് ജോലികള്‍ക്കിടെ മണ്ണിടിഞ്ഞ് പ്രായപൂര്‍ത്തിയാകാത്ത നാല് കുട്ടികള്‍ മരിച്ച സ്ഥലത്ത് സന്ദര്‍ശനം നടത്തി ബംഗാള്‍ ഗവര്‍ണര്‍ സി വി ആനന്ദ ബോസ്.
സംഭവം സംബന്ധിച്ച് തദ്ദേശവാസികളുമായും പ്രാദേശിക തൃണമൂല്‍ കോണ്‍ഗ്രസ് നേതാക്കളുമായും അദ്ദേഹം ആശയവിനിമയം നടത്തി. മരിച്ച കുട്ടികളുടെ മാതാപിതാക്കളും കുടുംബാംഗങ്ങളുമായും ഗവര്‍ണര്‍ സംസാരിച്ചു. തിങ്കളാഴ്ച രാത്രി ട്രെയിനില്‍ സഞ്ചരിച്ചാണ് ഗവര്‍ണര്‍ കിഷന്‍ഗഞ്ചിലെത്തിയത്. അവിടെ നിന്ന് ചോപ്രയിലേക്ക് റോഡ് മാര്‍ഗവും.
ഈ മാസം 12 ന് ചോപ്ര ബ്ലോക്കിലെ ചേതനാഗച്ച് ഗ്രാമത്തില്‍ കുഴിയെടുക്കുന്നതിനിടെ മണ്ണിടിഞ്ഞാണ് അഞ്ച് മുതല്‍ 12 വയസ് വരെ പ്രായമുള്ള നാല് കുട്ടികള്‍ മരിച്ചത്.
അതിര്‍ത്തി രക്ഷാ സേന(ബിഎസ്എഫ്) ആണ് നിര്‍മാണ പ്രവര്‍ത്തനങ്ങള്‍ നടത്തിയത് എന്നായിരുന്നു തൃണമൂല്‍ കോണ്‍ഗ്രസിന്റെ ആരോപണം. ഈ പശ്ചാത്തലായിരുന്നു ഗവര്‍ണറുടെ ചേതനാഗച്ച് ഗ്രാമ സന്ദര്‍ശനം. എന്നാല്‍ ആരോപണം അതിര്‍ത്തി രക്ഷാ സേന നിഷേധിച്ചു.
സ്വകാര്യ വ്യക്തിയാണ് കുഴിയെടുത്തതെന്നും തങ്ങള്‍ അതിന് അനുമതി നല്‍കുക മാത്രമാണ് ചെയ്തതെന്നും ബിഎസ് എഫ് വിശദീകരിച്ചു.
പ്രതികരിക്കാൻ ഇവിടെ എഴുതുക: