കോട്ടയം: യുവാവിനെ കൊലപ്പെടുത്താന്‍ ശ്രമിച്ച കേസില്‍ മധ്യവയസ്‌കന്‍ പൊലീസ് പിടിയിലായി. കുറിച്ചി മലകുന്നം, പൊടിപ്പാറ പള്ളി ഭാഗത്ത് പുത്തന്‍പുരയ്‌ക്കല്‍ വീട്ടില്‍ ലാലിച്ചന്‍ ഔസേഫ് (52) ആണ് ചിങ്ങവനം പൊലീസിന്റെ പിടിയിലായത്.
ലാലിച്ചന്‍ ഔസേഫും സുഹൃത്തും ചേര്‍ന്ന് കഴിഞ്ഞ ദിവസം കുറിച്ചി സ്വദേശി യുവാവിനെ കൊലപ്പെടുത്താന്‍ ശ്രമിക്കുകയായിരുന്നു. പൊടിപ്പാറ പള്ളി ഭാഗത്ത് വച്ച് രാത്രി പത്തരയോടെ റോഡിലൂടെ നടന്നു വരികയായിരുന്ന യുവാവിനെ തടഞ്ഞുനിര്‍ത്തി മര്‍ദ്ദിക്കുകയും കരിങ്കല്ലു കൊണ്ട് തലയ്‌ക്ക് അടിക്കുകയുമായിരുന്നു.
കളിയാക്കി എന്ന പേരിലായിരുന്നു ഇവര്‍ യുവാവിനെ ആക്രമിച്ചത്. പരാതിയെ തുടര്‍ന്ന് ചിങ്ങവനം പൊലീസ് കേസ് രജിസ്റ്റര്‍ ചെയ്യുകയും ഇയാളെ പിടികൂടുകയുമായിരുന്നു. കോടതിയില്‍ ഹാജരാക്കിയ ലാലിച്ചന്‍ ഔസേഫിനെ റിമാന്‍ഡ് ചെയ്തു. രണ്ടാമത്തെ പ്രതിക്കായി അന്വേഷണം ശക്തമാക്കി.
പ്രതികരിക്കാൻ ഇവിടെ എഴുതുക: